მოკლედ: ისრაელის საჰაერო თავდასხმას დამასკოსთან ახლოს, მაღალი რანგის ირანელი გენერალი ემსხვერპლა.

დეტალები: თავდასხმა ორშაბათს, საიდა ზეინაბის უბანში მოხდა, შიიტი მუსლიმების სალოცავთან ახლოს.

  • ირანის ოფიციალური საინფორმაციო სააგენტო IRNA წერს, რომ საიედ რაზი მუსავი იყო გენერალ ყასიმ სოლეიმანის ახლო თანამებრძოლი. სოლემანი, რომელიც ირანის ელიტური ძალების, ყუდსის მეთაური იყო, 2020 წლის იანვარში, ერაყში, აშშ-ის უპილოტო თვითმფრინავის თავდასხმის შედეგად დაიღუპა.
საიედ რაზი მუსავი და ყასემ სოლეიმანი

საიედ რაზი მუსავი და ყასემ სოლეიმანი

ფოტო: Tasnim

მომხდართან დაკავშირებით განცხადება არ გაუვრცელებია არც ისრაელის შეიარაღებულ ძალებს და არც სირიის სახელისუფლებო მედიას.

ირანის ოფიციალურმა პირებმა და რეგიონში მათმა მოკავშირე მებრძოლებმა პირობა დადეს, რომ მკვლელობისთვის შურს იძიებენ, თუმცა საპასუხო დარტყმა მაშინვე არ წამოუწყიათ.

რატომ არის მნიშვნელოვანი: ირანის გასამხედროებული რევოლუციური გვარდიის დიდი ხნის მრჩეველი, საიედ რაზი მუსავი სირიაში მოკლეს იმ ფონზე, როდესაც რეგიონში ომის გაფართოების საფრთხე მაღალია.

  • ირანის მიერ მხარდაჭერილმა დაჯგუფებებმა იემენში, ლიბანში, სირიასა და ერაყში არაერთხელ მიიტანეს იერიში ისრაელზე და მის მოკავშირეებზე, ჰამასის მხარდასაჭერად.
  • სულ უფრო მწვავდება შეტაკებები ლიბანისა და ისრაელის საზღვართან. ჰეზბოლა და ისრაელი, ერთმანეთის მიმართულებით რაკეტებს თითქმის ყოველ დღე ისვრიან.
  • ასევე, წითელ ზღვაში, იემენიდან ჰუსიტი აჯანყებულები თავს ესხმიან გემებს, რამაც შეაფერხა ვაჭრობა. გემების დასაცავად, აშშ-ის ხელმძღვანელობით, მრავალეროვნული საზღვაო ოპერაცია დაიწყო.

ამავე თემაზე: თავდასხმები წითელ ზღვაში — ვინ არიან ჰუსიტები და რატომ ბომბავენ გემებს

  • ირანის მიერ მხარდაჭერილმა დაჯგუფებამ, სახელწოდებით ისლამური წინააღმდეგობა ერაყში, ასევე განახორციელა 100-ზე მეტი თავდასხმა ერაყსა და სირიაში აშშ-ის ჯარისკაცების ბაზაზე, რაც მათი თქმით, ვაშინგტონის მიერ ისრაელის მხარდაჭერის პასუხი იყო.

ირანის პრეზიდენტის, იბრაჰიმ რაისის განცხადებაში ნათქვამია, რომ მუსავი "მოწამეობრივად დაიღუპა, სირიაში წმინდა სიწმინდეებისა და ისლამური იდეალების დაცვის დროს". პრეზიდენტმა თქვა, რომ "ისრაელის რეჟიმი აუცილებლად გადაიხდის ამ დანაშაულისთვის“.

  • სირიაში ირანის ელჩმა, ჰოსეინ აკბარიმ დაგმო მკვლელობა და თქვა, რომ მუსავი სირიაში "ფორმალურ სამხედრო მრჩევლად" იმყოფებოდა.
  • "ისრაელი აუცილებლად მიიღებს პასუხს ამ დანაშაულისთვის, საჭირო დროს და საჭირო სიტუაციაში", — თქვა აკბარიმ.