მეთიუ პერის გარდაცვალების მიზეზი აუტოფსიის შედეგად დადასტურდა. დადგინდა, რომ მსახიობი კეტამინის მწვავე ზემოქმედების შედეგად დაიღუპა. დასკვნაში სიკვდილის ხელშემწყობ ფაქტორებად წყალში დახრჩობა, კორონარული არტერიის დაავადება და ბუპრენორფინის ეფექტი დასახელდა.

///

ამასთან აღნიშნულია, რომ პერის გარდაცვალება უბედური შემთხვევა იყო. სიკვდილის ოფიციალურ მიზეზად "კეტამინის მაღალი შემცველობის შედეგად გულ-სისხლძარღვთა ჭარბი სტიმულაცია და რესპირატორული დეპრესია" დასახელდა.

სიტკომ Friends-ის მსახიობი და ჩენდლერის როლის შემსრულებელი 28 ოქტომბერს 54 წლის ასაკში გარდაიცვალა. ის ლოს-ანჯელესში, საკუთარ სახლში იპოვეს.

მსახიობი ბოლო 19 თვის განმავლობაში არანაირ ნარკოტიკულ ნივთიერებას არ მოიხმარდა. მან სიკვდილამდე დაახლოებით 10 დღით ადრე დეპრესიის კეტამინით მკურნალობა დაიწყო, რაც კვლევებით დადასტურებული ეფექტური მეთოდია.

პერი მენტალური ჯანმრთელობის პრობლემებსა და ნარკო და ალკოჰოლდამოკიდებულებას წლების განმავლობაში ებრძოდა, რაზეც მან 2022 წელს გამოცემულ მემუარშიც Friends, Lovers, and the Big Terrible Thing ისაუბრა. მსახიობი ნარკო და ალკოჰოლდამოკიდებულ ადამიანებს ეხმარებოდა კიდეც, რის გამოც მისი სიკვდილის შემდეგ მეთიუ პერის სახელობის ფონდი დაარსდა.

მეთიუს გარდაცვალებას Friends-ის ხუთეული საერთო განცხადებით გამოეხმაურა, რომელშიც ამბობდნენ, რომ ისინი ერთმანეთისთვის ოჯახი იყვნენ და მეგობრის დაღუპვით განადგურებულები არიან.

მეთიუ პერი გარდაცვალებამდე 1 წლით ადრე პოდკასტში იყო მიწვეული, რომელშიც ცხოვრებისა და კარიერის შესახებ ვრცლად ისაუბრა. ინტერვიუში მსახიობს ისიც ჰკითხეს, თუ როგორ სურდა სიკვდილის შემდეგ ადამიანებს გეხსენებინათ, რაზეც ასე უპასუხა:

"როცა მოვკვდები, არ მინდა, Friends იყოს პირველი, რაც გაახსენდებათ. მსურს, პირველი ის გაახსენდეთ, რომ ადამიანებს ვეხმარებოდი და ვაპირებ, დარჩენილი ცხოვრება ამის დასამტკიცებლად ვიცხოვრო", — განაცხადა მეთიუ პერიმ.

იხილეთ ასევე: