რა ხდება: მესამე დღეა, განათლებისა და მეცნიერების სამინისტროსთან პედაგოგები საპროტესტო აქციას მართავენ.

• ისინი მიიჩნევენ, რომ დირექტორთა შესარჩევი კონკურსიდან უსამართლოდ დაბლოკეს.
• მიზეზად სხვადასხვა ფაქტორს ასახელებენ.
• მაია ეკალაძის აზრით, რომელიც მესამე დღეა, სამინისტროსთან, პროტესტის ნიშნად შიმშილობს, ერთ-ერთი მიზეზი, შესაძლოა, პოლიტიკური დამოკიდებულებები იყოს, მათ შორის, ისიც, რომ მარტში, რუსული კანონის საწინააღმდეგო აქციებში მონაწილეობდა.
• ეკალაძე აღნიშნავს, რომ ეს შესარჩევი კონკურსების არასამართლიანად ჩატარების პირველი შემთხვევა არ არის და უკვე მრავალი წელია, 2014 წლის შემდეგ ასე ხდება.

პროტესტის მონაწილე პედაგოგების მოთხოვნაა: დირექტორების დანიშვნა დისკრეციული წესით იმ სკოლებში, რომლებსაც ამ დრომდე, დირექტორობის მოვალეობის შემსრულებლები ხელმძღვანელობენ.

გაიგე მეტი: "დირექტორებისგან არალეგალური საარჩევნო შტაბის შექმნა სურთ" — პროტესტის მეორე დღე სამინისტროსთან

რა წერია 19 საზოგადოებრივი ორგანიზაციის მიერ გავრცელებულ განცხადებაში

პროფესიული ჯგუფები, შექმნილი სიტუაციის განმუხტვისა და საჯარო სკოლის დირექტორების არჩევნების პროცესის ლეგიტიმურობის უზრუნველსაყოფად, განათლებისა და მეცნიერების სამინისტროს რეკომენდაციებით მიმართავენ:

• გამოცხადდეს ხელახალი კონკურსი იმ სკოლებში, სადაც სამეურვეო საბჭოსათვის არ იყო წარდგენილი დირექტორობის კანდიდატ(ებ)ი;
• შეიცვალოს სკოლებში დირექტორობის კანდიდატების წარდგენის წესი და ამ სკოლებში ნებისმიერ სერტიფიცირებულ კანდიდატს მიეცეს მისთვის სასურველ სკოლაში დირექტორობის კანდიდატად დარეგისტრირების უფლება. დირექტორობის კანდიდატის თანამდებობასთან შესაბამისობა გადაწყვიტოს მხოლოდ სკოლების სამეურვეო საბჭომ, სამინისტროს მიერ დანიშნული გასაუბრების გარეშე.
• სასერტიფიკატო წერითი გამოცდაჩაბარებული დირექტორობის მსურველებისთვის (162 ადამიანი) დაინიშნოს ხელახალი გასაუბრება. გასაუბრების წარმატებით დაძლევის შემთხვევაში, ამ პირებსაც მიეცეთ ხელახალ არჩევნებში მონაწილეობის უფლება;
• გაიმართოს მოლაპარაკებები სერტიფიცირებულ დირექტორობის კანდიდატებთან და იმ სკოლებში, სადაც არ იქნება სერტიფიცირებული კანდიდატი (1-3 პუნქტის განხორციელების შემდეგაც), დისკრეციის უფლებით დაინიშნონ სერტიფიცირებული კანდიდატები. ასეთ(ებ)ის არ არსებობის შემთხვევაში, დისკრეციის უფლებამოსილების გამოყენება დასაბუთებული იყოს არგუმენტირებულად.
• შეიქმნას სამუშაო ჯგუფი (სპეციალური კომისია), რომელიც უზრუნველყოფს სკოლის დირექტორობის შერჩევისა და არჩევის ახალი წესის შემუშავებას, რომლის საფუძველზეც მომავალში ჩატარდება დირექტორების კონკურსი; სასერტიფიკატო გამოცდაჩაბარებული დირექტორობის მსურველებისთვის (162 ადამიანი) ჩაატარებს გასაუბრებას და შეიმუშავებს სტრატეგიას სკოლის დირექტორების მუდმივი პროფესიული განვითარების სისტემის შესაქმნელად.
• "სანდოობის უზრუნველყოფის მიზნით, მნიშვნელოვანია, რომ აღნიშნული კომისია დაკომპლექტებული იყოს მაღალი რეპუტაციის მქონე თემატური საზოგადოებრივი ორგანიზაციების, განათლების სპეციალისტების, სახალხო დამცველისა და სხვა შესაბამისი წარმომადგენლების მიერ", — აღნიშნავენ ორგანიზაციები და ასევე, მოითხოვენ,
• სამუშაო ჯგუფის მიერ შექმნილი დოკუმენტების აღსრულების ვალდებულება დაეკისროს მთავრობას, პარლამენტსა და განათლებისა და მეცნიერების სამინისტროს.

ამავე თემაზე: შიმშილობის ერთი დღე — რას აპროტესტებენ მასწავლებლები

განცხადებას ხელს აწერენ ორგანიზაციები:

1. განათლების კოალიცია

2. სამოქალაქო ინტეგრაციისა და ეროვნებათშორისი ურთიერთობების ცენტრი (CCIIR)

3. სამართლიანი არჩევნებისა და დემოკრატიის საერთაშორისო საზოგადოება (ISFED)

4. ღია სივრცე კავკასია (COS)

5. სოციალური სამართლიანობის ცენტრი (SJC)

6. მშობლები განათლებისთვის

7. საფარი

8. სამოქალაქო მოძრაობა თავისუფლებისთვის

9. საქართველოს დემოკრატიული ინიციატივა (GDI)

10. ა(ა)იპ შეხვედრის ადგილი დმანისი

11. თავისუფალი ასოციაცია

12. საერთაშორისო გამჭვირვალობა, საქართველო

13. ადამიანის უფლებათა ცენტრი (HRC)

14. დემოკრატიის მცველები

15. სამოქალაქო განათლებისა და რეაბილიტაციის ცენტრი (CERC)

16. ოჯახები დისკრიმინაციის წინააღმდეგ (FAD)

17. საქართველოს ახალგაზრდა იურისტთა ასოციაცია (GYLA)

18. საქართველოს მომავლის აკადემია (GFA)

19. პარტნიორობა ადამიანის უფლებებისთვის (PHR)