ცოტა ხნის წინ ჯო ბაიდენმა მადლიერების დღესთან დაკავშირებით ორი ინდაური შეიწყალა. ტრადიციული დღესასწაული აშშ-ში წელსაც აღინიშნა და ცერემონიაც ჩატარდა. საზოგადოების წინაშე გამოსულ ჯო ბაიდენს კი, თავის სიტყვაში ტეილორ სვიფტი ბრიტნი სპირსში აერია.

"ინდაურებმა დიდ კონკურენციას გაუძლეს, რადგან თავიდან აქ მოხვედრის საკმაოდ მცირე შანსები ჰქონდათ. აქ მოსახვედრად მათ დიდი შრომა, მოთმინების გამოჩენა და 1600-ზე მეტი კილომეტრის გავლა მოუწიათ. შეიძლება ითქვას, ეს იმაზე უფრო რთულია, ვიდრე Renaissance-ის ტურნეზე ან ბრიტნის ტურნეზე ბილეთის შოვნა. ის [ბრიტნი] ახლა ბრაზილიაშია, სადაც ძალიან თბილა", — განაცხადა ჯო ბაიდენმა.

აღსანიშნავია, რომ ტეილორ სვიფტი ტურნეს ფარგლებში ბრაზილიაში სწორედ ახლახან იყო, ბრიტნი სპირსს კი ამჟამად ტურნე საერთოდ არ აქვს. ბაიდენის წარმომადგენლებს ამ საკითხზე კომენტარი ჯერ არ გაუკეთებიათ, თუმცა აშკარაა, რომ აშშ-ის პრეზიდენტს ორი ცნობილი მომღერალი ერთმანეთში აერია.

შეგახსენებთ, რომ ტეილორ სვიფტმა მსოფლიო ტურნე მარტში დაიწყო. ტურნე, სახელად The Eras Tour, მსოფლიო მასშტაბით 2024 წლის ჩათვლით გაგრძელდება.