რა ხდება: ისრაელის თავდაცვის ძალებმა (IDF) გაავრცელა ჩანაწერი, სადაც, მათი განმარტებით, ჩანს, თუ როგორ გადაჰყავთ ღაზის ყველაზე დიდ საავადმყოფოში, ალ-შიფაში ისრაელელი ტყვეები, რომლებიც ჰამასმა 7 ოქტომბერს გაიტაცა.

  • თავდაცვის ძალების წარმომადგენლის თქმით, ერთ-ერთი მათგანი, 19 წლის სამხედრო გოგო, კაპრალი ნოა მარჩიანო ალ-შიფაში მცირე დაზიანებებით გადაიყვანეს, შემდეგ კი — მოკლეს.
  • "IDF-ის დაბომბვის დროს, ჰამასის ტერორისტი, რომელსაც ნოა ჰყავდა დაკავებული, მოკვდა, გოგო კი დაიჭრა, თუმცა ეს არ იყო სიცოცხლესთან შეუთავსებელი ჭრილობა. ნოა შიფას საავადმყოფოში გადაიყვანეს, სადაც ის ჰამასის სხვა ტერორისტმა მოკლა", — თქვა IDF-ის სპიკერმა დანიელ ჰაგარიმ.

რა ჩანს ვიდეოში: ჰაგარიმ წარადგინა სათვალთვალო კამერის ჩანაწერი, სადაც, მისი თქმით, 7 ოქტომბრის კადრები ჩანს — დღის, როდესაც ჰამასი ისრაელს დაესხა თავს, მოკლა 1200 ადამიანი, 240-ზე მეტი კი ტყვედ აიყვანა.

  • ვიდეოში ჩანს, რომ 2 ტყვე შიფას საავადმყოფოში მიიყვანეს.
  • მანამდე, ისრაელის თავდაცვის ძალებმა გაავრცელა ჩანაწერი, სადაც, მათი განმარტებით, გვირაბის შესასვლელი ჩანს, რომელიც ალ-შიფას ტერიტორიაზე იპოვეს.
  • ისრაელის მტკიცებით, ეს არის იმისი დადასტურება, რომ საავადმყოფოს ბევრ შენობას ჰამასი ტერორისტული საქმიანობისთვის იყენებს.
  • აშშ, ასევე, ამბობს, რომ დაზვერვის ინფორმაციით, ჰამასი ღაზაში მდებარე საავადმყოფოებს, მათ შორის — ალ-შიფას ტერიტორტული საქმიანობისთვის და შეიარაღების შესანახად იყენებს.

ბოლო ხაზი: 15 ნოემბერს ცნობილი გახდა, რომ ისრაელმა ალ-შიფაში სპეცოპერაცია დაიწყო.

  • საავადმყოფოს დირექტორის თქმით, მათთან 650 პაციენტი, 500 მედპერსონალი და 5 ათასი დავნილი იმყოფება.
  • მისივე თქმით, საავადმყოფოს გარშემო ისრაელის ტანკებია, შენობაში და გარე პერიმეტრზე კვლავ ისრაელელი ჯარისკაცები დადიან. კლინიკაში უკვე დიდი ხანია, აღარ არის საკვები, სასმელი წყალი და წამლები.