რა ხდება: ისრაელის შეიარაღებული ძალების განცხადებით, ჰამასის წინააღმდეგ სპეცოპერაციას ღაზის სექტორის ყველაზე დიდ საავადმყოფოში, ალ-შიფაში ატარებენ.

დეტალები: თავდაცვის ძალების (IDF) განცხადებაში ნათქვამია, რომ დაზვერვის ინფორმაციაზე დაყრდნობით, მიმდინარეობის ზუსტი და მიზანმიმართული ოპერაცია კონკრეტულ ტერიტორიაზე, შიფას საავადმყოფოში.

  • "IDF-ში არიან სამედიცინო ჯგუფები და არაბულენოვანი ჯარისკაცები, რომლებმაც სპეციალური მომზადება გაიარეს ამ რთული და სენსიტიური ოპერაციისთვის, რომლის განზრახვაც არ არის მოსახლეობისთვის ზიანის მიყენება", — წერია განცხადებაში.
  • თავდაცვის ძალები, ასევე აღნიშნავს, რომ ახალშობილებისთვის ინკუბატორები, საკვები და სამედიცინო მარაგები უკვე საავადმყოფოშია.

ისრაელი ამბობს, რომ სწორედ ალ-შიფას საავადმყოფოს ტერიტორიაზე მდებარეობს ჰამასის ყველაზე მნიშვნელოვანი მართვის პუნქტები.

ჰამასის პასუხი IDF-ის ოპერაციაზე: დანაშაული კაცობრიობის წინაშე — ასე აფასებს ღაზის მმართველი დაჯგუფება ისრაელის სამხედრო მოქმედებებს საავადმყოფოს ტერიტორიაზე.

  • ჰამასის ხელისუფლების წარმომადგენლის თქმით, რეიდის დაწყებისას საავადმყოფოში 9 ათასი პაციენტი, სამედიცინო გუნდის წევრი და დევნილი პირი იმყოფებოდა.
    სოციალურ ქსელ X-ზე პალესტინის საინფორმაციო ცენტრმა გაავრცელა ვიდეო, სადაც ჰამასის ერთ-ერთი ლიდერი იზატ არ-რიშქი ამბობს, რომ ისრაელმა დაარტყა შენობას, სადაც მოსახლეობა იმყოფება, და არა — სამხედრო ნაგებობას.
  • მანამდე, ჰამასმა თქვა, რომ რეიდზე პასუხისმგებლობას ვაშინგტონს და აშშ-ის პრეზიდენტ ჯო ბაიდენს აკისრებენ.

რა ვიცით მსხვერპლის შესახებ: უკვე მეოთხე დღეა, რაც პალესტინის ჯანდაცვის სამინისტროს ღაზაში აღარ გამოუქვეყნებია დაღუპულების და დაშავებულების სტატისტიკა.

  • გაეროს ჰუმანიტარულ საქმეთა კოორდინაციის ოფისის (OCHA) ინფორმაციით, ჩრდილოეთით მდებარე საავადმყოფოებთან კომუნიკაცია გაწყდა.
  • პარასკევის მონაცემებით, ომის შედეგად გარდაცვლილი პალესტინელების რაოდენობა 11 078 იყო, აქედან 4 506 ბავშვი, 3 027 კი ქალია.
  • 7 ოქტომბერს ისრაელში, ჰამასის თავდასხმებს, 1200 ადამიანი ემსხვერპლა, 200-ზე მეტი დაჯგუფებამ ტყვედ აიყვანა.