რა ხდება: ისრაელის მტკიცებით, ღაზაში მდებარე საავადმყოფოში, ალ-შიფაში გვირაბის შესასვლელი იპოვეს.

დეტალები: ისრაელელი ჯარისკაცები ალ-შიფაში რეიდს ატარებენ. თავდაცვის ძალების (IDF) ინფორმაციით, ჰქონდათ დაზვერვის მიერ მიწოდებული ინფორმაცია, რომ სწორედ საავადმყოფოს ქვეშ არის ჰამასის მთავარი გვირაბები.

  • ვიდეოში, რომელიც IDF-მა გაავრცელა, ჩანს ღრმული მიწაში, რომელიც, მათი მტკიცებით, გვირაბის შესასვლელია. კადრებში ჩანს, ასევე, მილები და კაბელები. ასევე, კადრში ჩნდება საავადმყოფოს ერთ-ერთი მთავარი შენობა.
  • IDF-ის მტკიცებით, იპოვეს დამალული მანქანაც, რომელშიც დიდი რაოდენობით იარაღი და საბრძოლო აღჭურვილობა იყო.

რას ამბობს ჰამასი: დაჯგუფება ისრაელის ინფორმაციას უსაფუძვლო ტყუილს უწოდებს. მათ მიერ გავრცელებულ განცხადებაში ნათქვამია, რომ ყველაფერი, რასაც ისრაელი ალ-შიფას შესახებ ამბობს, სიცრუეა და ვიდეო — ყალბი სცენარით არის დადგმული.

  • განცხადებაში, ასევე, ნათქვამია, რომ პალესტინის ჯანდაცვის სამინისტრომ არაერთხელ მიმართა ყველა ინსტიტუციას, საერთაშორისო ორგანიზაციას, შეექმნათ ტექნიკური ჯგუფები, რომლებიც მოინახულებდნენ და შეისწავლიდნენ ყველა საავადმყოფოს, რაც დაადასტურებდა, რომ ისრაელის ბრალდება, თითქოს საავადმყოფოებში ჰამასის ინფრასტრუქტურაა განლაგებული, ტყუილია.

რა ვითარებაა ალ-შიფას საავადმყოფოში: ღაზის მთავარი კლინიკის დირექტორი ამბობს, რომ აღარ აქვთ ჟანგბადი და წყალი.

  • მუჰამად ანუ სალმიას შეფასებით, ალ-შიფაში ტრაგიკული პირობებია, აქ 650 პაციენტი, 500 მედპერსონალი და 5 ათასი დავნილი ადამიანია.
  • მისივე თქმით, საავადმყოფოს გარშემო ისრაელის ტანკებია, შენობაში და გარე პერიმეტრზე კვლავ ისრაელელი ჯარისკაცები დადიან.
  • ჟურნალისტი, რომელიც საავადმყოფოშია ჩარჩენილი, BBC-სთან ამბობს, რომ IDF-ის წარმოამდგენლები არიან ყველგან და ისვრიან ყველა მიმართულებით. ამ ინფორმაციის დადასტურება, ჯერჯერობით, ვერ ხერხდება.