აშშ-მა სირიაში ორ ობიექტს დაარტყა, რომელსაც, მათი ინფორმაციით, ირანის ისლამური რევოლუციის გუშაგთა კორპუსი და მის მიერ მხარდაჭერილი ჯგუფები იყენებდნენ.

  • ჯერჯერობით, არ არის ცნობილი, არიან თუ არა დარტყმის შედეგად დაშავებულები.

ოპერაციის მიზანი: პენტაგონის განცხადებით, ოპერაცია არ უკავშირდება ისრაელ-ჰამასის ომს. აშშ-ის თავდაცვის მდივანმა, ლოიდ ოსტინმა ხაზი გაუსვა, რომ ეს არის "გზავნილი ირანისთვის".

  • ოსტინის განმარტებით, ეს თავდაცვითი დარტყმები იყო, რათა დაეცვათ ამერიკელი ჯარისკაცები ერაყსა და სირიაში, რომლებზეც შეტევა ირანის მიერ მხარდაჭერილმა გასამხედროებულმა ჯგუფებმა მიიტანეს.
  • "აშშ-ის ძალებზე ეს თავდასხმები მიუღებელია და უნდა შეწყდეს", — თქვა ოსტინმა.

კონტექსტი: ბოლო დღეების განმავლობაში, აშშ-ის და კოალიციის ჯარებს ერაყში 12-ჯერ დაესხნენ თავს დრონებით, 4-ჯერ კი სირიაში. შედეგად, დაშავდა 21 ჯარისკაცი. მათ მცირე დაზიანებები აქვთ.

სირიაში, აშშ-ის 900-მდე ჯარისკაცი იმყოფება, 2500 კი - მეზობელ ერაყში. ხუთშაბათს აშშ-მა განაცხადა, რომ რეგიონში კიდევ 900 ჯარისკაცი ჩავა.