შესაძლოა, რადიო თავისუფლების პროექტები, "წითელი ზონა" და "ინტერVIEW", ახალი სატელევიზიო სეზონიდან საზოგადოებრივი მაუწყებლის აჭარის ტელევიზიის ეთერში გავიდნენ.

აჭარის ტელევიზიის დირექტორი, ნათია კაპანაძე On.ge-სთან საუბარში ამბობს, რომ მოლაპარაკებები ჯერ საწყის ეტაპზეა და მისი გაგრძელება რადიო თავისუფლებასა და საქართველოს საზოგადოებრივი მაუწყებელს შორის ურთიერთვალდებულების ამოწურვაზეა დამოკიდებული. თუმცა, ნათია კაპანაძის თქმით, აჭარის ტელევიზიისა და მისი მაყურებლისთვის საინტერესო იქნება რადიო თავისუფლების პროექტების ეთერში ხილვა და მას იმედი აქვს, რომ მოლაპარაკებები წარმატებული იქნება.

საქართველოს საზოგადოებრივმა მაუწყებელი რადიო თავისუფლების გადაცემებს ამიერიდან ეთერში არ გაუშვებს. სალომე ასათიანის ბოლო გადაცემა პირველი არხის მაყურებელმა 6 ივლისს ნახა. სწორედ მიმდინარე ზაფხულს შეწყდება გოგი გვახარიას გადაცემის ჩვენებაც.

როგორც საქართველოს საზოგადოებრივი მაუწყებლის დირექტორმა, ვასილ მაღლაფერიძემ განმარტა, მან გადაცემები კი არ დახურა, უბრალოდ, კონტრაქტი არ გააგრძელა რადიო თავისუფლებასთან, რადგან უკმაყოფილო იყო თანამშრომლობის ფორმატით. ვასილ მაღლაფერიძე მიიჩნევს, რომ მაუწყებელს აღნიშნული გადაცემების შექმნის პროცესში უნდა მიეღო მონაწილეობა და მხოლოდ პლატფორმის ფუნქცია არ უნდა შეესრულებინა.

რადიო თავისუფალი ევროპა / რადიო თავისუფლების პრეზიდენტმა თომას კენტმა მიმდინარე წლის ივნისში განაცხადა, რომ [საზოგადოებრივი მაუწყებლის] გადაწყვეტილება "გაწბილებას იწვევს, რადგან ამ ორ პროგრამას მნიშვნელოვანი წვლილი შეჰქონდა საჯარო დისკურსსა და პოლიტიკურ განვითარებაში".