რადიო თავისუფალი ევროპა / რადიო თავისუფლება საზოგადოებრივ მაუწყებელზე გადაცემების, წითელი ზონისა და ინერVIEW-ს შეწყვეტას ეხმაურება.

რადიო თავისუფალი ევროპა / რადიო თავისუფლების პრეზიდენტმა თომას კენტმა განაცხადა, რომ [საზოგადოებრივი მაუწყებლის] გადაწყვეტილება "გაწბილებას იწვევს, რადგან ამ ორ პროგრამას მნიშვნელოვანი წვლილი შეჰქონდა საჯარო დისკურსსა და პოლიტიკურ განვითარებაში", მაგრამ, მისივე თქმით, კომპანია განიხილავს სხვა შესაძლებლობებს და იმედოვნებს, რომ პროგრამები სხვა პლატფორმებზე განაგრძობს არსებობას.

განცხადებაში ასევე ნათქვამია, რომ მრავალმა პროფესიულმა თუ სადამკვირვებლო ორგანიზაციამ არ დააყოვნა კრიტიკის გამოთქმა პროგრამების დახურვის შესახებ ცნობის გამო. მაგალითად არის მოყვანილი საქართველოს ჟურნალისტური ეთიკის ქარტიის, 14 ივნისს გავრცელებული განცხადება, რომ პროგრამები შენარჩუნებულ იქნეს.

13 ივნისს ცნობილი გახდა, რომ საზოგადოებრივ მაუწყებელზე სალომე ასათიანის ინტერVIEW და გოგი გვახარიას წითელი ზონა ივლისის შუა რიცხვებიდან აღარ გავა. მაუწყებლის სტრატეგიული სამსახურის უფროსი, ია ანთაძე ამბობს, რომ მომავალი სეზონიდან მაუწყებლის ეთერში მხოლოდ კონკურსის წესით შერჩეული ან საკუთარი რესურსით დამზადებული გადაცემები მოხვდება. საზოგადოებრივი მაუწყებლის მიმდინარე და ახალი ამბების ბლოკის დირექტორმა, გიორგი გვიმრაძემ კი On.ge-ს უთხრა, რომ რადიო თავისუფლებამ მაუწყებლისგან ხელშეკრულებების ვადის ამოწურვის შესახებ მიიღო წერილი, თუმცა გაგრძელდება თუ არა გადაცემები, გვიმრაძეს კონკრეტული პასუხი არ აქვს.