მინესოტას აეროპორტის თანამშრომლებმა ერთ-ერთი მგზავრის ბარგში პატარა ყუთი იპოვეს, რომელიც ჟირაფის ფეკალიებით სავსე აღმოჩნდა. აშშ-ის საზღვრის დაცვის სამსახურის ცნობით, მგზავრი კენიიდან აშშ-ში 29 სექტემბერს ჩავიდა და ფეკალიებიც სწორედ იქიდან წამოიღო.

"მგზავრმა დაადასტურა, რომ ყუთში ჟირაფის ფეკალიები იყო, რომელიც კენიიდან წამოიღო და მისგან ყელსაბამის დამზადებას გეგმავდა. პროტოკოლის მიხედვით, ფეკალიები ორთქლის სტერილიზაციის გზით განადგურდა", — ნათქვამია დაცვის სამსახურის განცხადებაში. მგზავრმა კი განაცხადა, რომ სამკაულების გასაკეთებლად ადრე ლოსის ფეკალიებიც გამოუყენებია.

"აშშ-ის ტერიტორიაზე ფეკალიების შეტანა რეალურ საფრთხეს ქმნის. თუ მგზავრის ისე გადაკვეთდა აშშ-ის საზღვარს, რომ ფეკალიების შესახებ არაფერს იტყოდა, არსებობს შანსი, რომ მსგავსი სამკაულისგან ვინმე დაავადებულიყო ან ჯანმრთელობის სერიოზული პრობლემები შემქნოდა", — განაცხადა ჩიკაგოს საველე ოპერაციების ოფისის დირექტორმა.

განცხადებაში ასევე ნათქვამია, რომ აშშ-ში ცხოველის ფეკალიების შეტანა ვეტერინარული სამსახურისგან სპეციალურ ნებართვას მოითხოვს. ასევე აღსანიშნავია, რომ კენიაში ღორის აფრიკული ცხელება, ღორის ცხელება და ნიუკასლის დაავადება კვლავ გავრცელებულია.