რატომ არის მნიშვნელოვანი: ოკუპირებული აფხაზეთის დე ფაქტო ლიდერმა, ასლან ბჟანიამ განაცხადა, რომ უახლოეს მომავალში ოჩამჩირეში რუსეთის საზღვაო ძალების მუდმივი ბაზა იქნება.

  • მისივე სიტყვებით, ამის მიზანია როგორც აფხაზეთის, ისე რუსეთის თავდაცვისუნარიანობის დონის ამაღლება.
  • აღნიშნულ განცხადებას გამოეხმაურა საქართველოს პრეზიდენტი, სალომე ზურაბიშვილიც.
  • "ეს დიდი ნაღმია შავი ზღვის უსაფრთხოების, ხვალინდელი ანაკლიის პორტისა და საქართველოს ევროპული გზისათვის", — განაცხადა მან.

დეტალები: NATO-ს საპარლამენტო ასამბლეამ მიიღო რეზოლუცია, რომელშიც ოჩამჩირეში რუსული ბაზის საკითხს ეხმაურება.

  • რეზოლუციის სახელია "სტაბილურობისა და უსაფრთხოების გაძლიერება შავი ზღვის რეგიონში რუსეთის სრულმასშტაბიანი სამხედრო შეჭრის შემდეგ უკრაინაში".
  • "ვგმობთ რუსეთის გაცხადებულ განზრახვას, ააშენოს საზღვაო ბაზა ოჩამჩირეში, მათ მიერ უკანონოდ ოკუპირებულ საქართველოს ტერიტორიაზე", — წერია რეზოლუციაში.
  • განცხადებაში ასევე აღნიშნულია, რომ ეს არის რუსეთის ფედერაციის პირდაპირი მუქარა, რაც საფრთხეს უქმნის მშვიდობასა და სტაბილურობას ევროატლანტიკურ სივრცეში.