ცოტა ხნის წინ ამერიკელი მძღოლი ჩამონგრეული ხიდიდან გადავარდა და დაიხრჩო. გარდაცვლილის ოჯახი მომხდარში Google-ს ადანაშაულებს, რადგან მძღოლი რუკას მიჰყვებოდა, რომელიც განახლებული არ აღმოჩნდა. ოჯახი ამტკიცებს, რომ ფილიპ პაქსონის გარდაცვალება Google Maps-ის დაუდევრობის შედეგია, რადგან პროგრამამ ის ხიდი აჩვენა, რომელიც 9 წლის წინ არსებობდა.

Google-ის წარმომადგენელმა განაცხადა, რომ კომპანია ბრალდებებს აუცილებლად განიხილავს. გარდაცვლილის ოჯახმა კი სამოქალაქო სასამართლოში სარჩელი უკვე შეიტანა. ფილიპ პაქსონი თავისი შვილის დაბადების დღის წვეულებიდან, რომელიც მისთვის უცნობ უბანში გაიმართა, სახლში ბრუნდებოდა. ფილიპის ცოლმა შვილები სახლში ადრე წაიყვანა, ის კი ადგილის დასალაგებლად დარჩა.

ფოტო: BBC

"ადგილობრივ გზებს არ იცნობდა, ამიტომ Google Maps-ს მიჰყვებოდა და იმედოვნებდა, რომ აპლიკაცია სახლში ცოლთან და შვილებთან უსაფრთხოდ მიიყვანდა. სიბნელესა და წვიმაში Google Maps-ის მითითებებს გაჰყვა, რომლებიც მოძველებული აღმოჩნდა", — განაცხადა ოჯახის ადვოკატმა.

სარჩელის მიხედვით, 2013 წლის შემდეგ, როცა ხიდი ჩავარდა, ადგილობრივებმა Google-ს რუკების გასასწორებლად არაერთხელ მიმართეს. გარდაცვლილი მძღოლის ოჯახი Google-ის გარდა კიდევ 3 ადგილობრივ კომპანიას უჩივის, რომლებსაც ხიდის შეკეთება ევალებოდათ.