რუსეთის შორეულ ჩრდილოეთ ნაწილში მდებარე ერთ-ერთ პარკში საბჭოთა დროინდელი თვითმფრინავის საწინააღმდეგო იარაღი დგას, რომელიც ნორმაზე 150-ჯერ მეტ რადიაციას ასხივებს.

ეს სულ ახლახანს გახდა ცნობილი, მიუხედავად იმისა, რომ მეორე მსოფლიო ომის მონუმენტი 4 წელია, რაც არხანგელსკის საზოგადოებრივ პარკში დგას. ეს აღმოჩენა ადგილობრივმა დიმიტრი სურინმა გააკეთა, რომელმაც ქალაქის მთავარი სანახაობების შემოწმება პორტაბელური რადიაციის საზომით ინტერესის გამო დაიწყო.

დეტექტორმა 46,99 დააფიქსირა, როდესაც უსაფრთხო დონე სულ რაღაც 0,30-ია.

ფოტო: DMITRY SURIN/VKONTAKTE

ის რადიაციის ასეთ მაღალ დონეს არ მოელოდა. მან თავისი აღმოჩენები პოპულარულ სოციალურ ქსელ VKontakte-ში გააზიარა. პარკს, რომელიც ნაცისტურ გერმანიაზე გამარჯვების სიმბოლოა, საკმაოდ ხშირად სტუმრობენ ადგილობრივები, ტურისტები და, განსაკუთრებით, ბავშვები, რომლებიც ამ მონუმენტზე დაცოცავენ.

დიმიტრიმ საგანგებო სიტუაციების სამსახურში დარეკა და მათმა რეაქციამ გაოცებული დატოვა. „მათ სერიოზულად აღიქვეს ყველაფერი და ნახევარ საათში ადგილზე გაჩნდნენ. იარაღი შუა ღამისთვის უკვე მოშორებული იყო“. - ამბობს ის

დიმიტრის აზრით, მონუმენტი იმიტომაა რადიოაქტიური, რომ „სანამ საჯარო სივრცეში დადგამდნენ, ვიღაცას დაავიწყდა რადიოაქტიური ნაწილების მოშორება“. ქალაქის მერიაში ამბობენ, რომ იარაღი თავდაცვის სამინისტროსგან 2013 წელს გამოითხოვეს და მან „ყველა საჭირო შემოწმება გაიარა“. იარაღი საგანგებო სიტუაციების სამსახურმა ქალაქის გარეთ წაიღო და უფრო დეტალურ შემოწმებას გაივლის.