ცნობილი ირლანდიელი მსახიობი სერ მაიკლ გემბონი 82 წლის ასაკში გარდაიცვალა. ინფორმაციას ამის შესახებ ოჯახის სახელით ავრცელებს მსახიობის წარმომადგენელი კლერ დობსი.

"საყვარელი ქმარი და მამა, მაიკლი, საავადმყოფოში გარდაიცვალა პნევმონიის გართულების შედეგად", — წერია განცხადებაში, — "ცოლი ენი და შვილი ფერგიუსი მის გვერდით იმყოფებოდნენ".

გემბონს მაყურებელთა დიდი ნაწილი ჰარი პოტერის ფილმებში მონაწილეობით იცნობდა. მსახიობი პოტერიადის მესამედან მერვე ფილმამდე ჰოგვორტსის მაგიისა და ჯადოქრობის სკოლის დირექტორს, ალბუს დამბლდორს, ასახიერებდა. როლზე გემბონი მას შემდეგ დაამტკიცეს, რაც პირველ და მეორე ფილმში პერსონაჟის შემსრულებელი რიჩარდ ჰარისი გარდაიცვალა.

ჰარი პოტერის გარდა, გემბონმა გამორჩეული როლები შეასრულა ასევე სერიალებში The Singing Detective და Maigret. მისი საეკრანო დებიუტი ჯერ კიდევ 1965 წელს შედგა, როცა ფილმში ოტელო ლორენს ოლივიესთან ერთად ითამაშა. გემბონი ასევე გახლდათ ოლივიეს დაფუძნებული ეროვნული სამეფო თეატრის ერთ-ერთი პირველი მსახიობი.

ხანგრძლივი კარიერის განმავლობაში, რომელმაც ექვსი ათწლეული მოიცვა, მაიკლ გემბონმა არაერთი პრესტიჟული პრიზიც დაიმსახურა. მსახიობი ლორენს ოლივიეს პრემიის სამგზის და ბრიტანული კინოაკადემიის დაჯილდოების (BAFTA) ოთხგზის ლაურეატია. სამსახიობო სფეროში შეტანილი განსაკუთრებული წვლილისთვის დედოფალმა ელიზაბეთ II-მ გემბონი 1998 წელს რაინდის წოდებითაც დააჯილდოვა.