რამდენიმე თვის წინ ინტერნეტში ვირუსულად გავრცელდა ვიდეო, რომელშიც ვხედავთ, რომ ლანა დელ რეი ალაბამას ერთ-ერთ Waffle House-ში მიმტანად მუშაობს. პოპულარულ რესტორანში მისულ სტუმრებს ლანა დელ რეი მიმტანის ფორმაში გამოწყობილი შეეგება, თან ბეიჯიც ეკეთა, რომელზეც მისი სახელი ეწერა.

ახლახან ლანა დელ რეი Waffle House-ში გადაღებულ ვიდეოსა და ფოტოებს გამოეხმაურა. როგორც აღმოჩნდა, რესტორანში მუშაობა არანაირ რეკლამას არ უკავშირდებოდა და ეს ყველაფერი შემთხვევით მოხდა. მომღერლის თქმით, ალაბამას ამ რესტორანში ნათესავებთან ერთად ხშირად დადიოდა. ერთ დღესაც კი, როცა 3 საათი Waffle House-ში გაატარა, ფორმის ჩაცმა ხუმრობით შესთავაზეს, რაზეც ის სიამოვნებით დათანხმდა.

მომღერალმა მისი პირველი შეკვეთაც გაიხსენა, როცა რესტორნის მომხმარებლისთვის კოკა-კოლა უნდა მიეტანა. ლანა დელ რეის თქმით, ყინულიც დაავიწყდა და ჭიქაც ცარიელი მიიტანა. რაც შეეხება ინტერნეტში გავრცელებულ ვიდეოს, მომღერალს ეგონა, რომ ათასობით შეტყობინება ახალი ალბომის გამო მიიღო, რადგან არც კი იცოდა, რომ Waffle House-ში ვინმე უღებდა.

"Waffle House-ის ვიდეოს მსგავსად, ნეტავ, ჩემი ალბომი გავირუსებულიყო. როცა მეორე დილით გავიღვიძე, 10 ათასამდე შეტყობინება დამხვდა. ზოგიერთის ავტორები კი ის ადამიანები იყვნენ, რომლებთანაც ბოლო 10 წელია, კონტაქტი არ მქონია. ყველა მწერდა, რომ Waffle House-ში გადაღებული ვიდეო ნახეს, მე კი მეგონა, რომ ჩემს ახალ ალბომს მოუსმინეს", — ამბობს ლანა დელ რეი.

ცნობისთვის, ლანა დელ რეის ახალი ალბომი, სახელად Did You Know That There's a Tunnel Under Ocean Blvd, მარტში გამოვიდა. Billboard-ზე კი ახალ 200 საუკეთესო ალბომს შორის მე-3 ადგილი უკავია.