დეტალები: მთიანი ყარაბაღის საგარეო საქმეთა სამინისტრო აცხადებს, რომ მოქალაქეებს შორის არის მსხვერპლი.

  • ამ დროისთვის არსებული მონაცემებით, სულ მცირე 2 ადამიანი დაიღუპა, მათ შორის ერთი ბავშვია.
  • დაიჭრა 11 ადამიანი, მათ შორის 8 ბავშვია.
  • სივილნეტის ცნობით, სტეფანაკერტის არევიკის ბავშვთა საავადმყოფოში დაადასტურეს, რომ მათთან 6-7 ბავშვია გადაყვანილი.
  • საავადმყოფოში მათი მდგომარეობის შესახებ დეტალებს არ აკონკრეტებენ.

გარდა ამისა, საგარეო საქმეთა მინისტრი წერს, რომ აზერბაიჯანი აგრძელებს მთიანი ყარაბაღის ეთნიკურ წმენდას, რის შედეგადაც 120 000 ადამიანი იძულებული გახდა, სახლი დაეტოვებინა.

  • მანვე აღნიშნა, რომ მოწმენი არიან, როგორ მიიწევს აზერბაიჯანი გენოციდის პოლიტიკის განსახორციელებლად მშვიდობიანი მოსახლეობის ფიზიკური განადგურებისკენ, სამოქალაქო ობიექტების განადგურებისკენ და დაბომბილი სახლის ვიდეო გამოაქვეყნა.

რა მოხდა: აზერბაიჯანი მთიან ყარაბაღს მძიმე არტილერიით ბომბავს. სტეფანაკერტში აფეთქებების ხმა ისმის.

  • ბაქო ამტკიცებს, რომ ეს ანტიტერორისტული ოპერაციაა, რომლის სამიზნე არ არის სამოქალაქო დასახლებები ან ინფრასტრუქტურა და მხოლოდ სომხეთის შეიარაღებული ძალების სამხედრო ობიექტებს ესვრიან.
  • თუმცა ყარაბაღის ოფიციალური პირები თავდასხმას გენოციდად აფასებენ და აცხადებენ, რომ სამოქალაქო დასახლებებიც იბომბება.

აზერბაიჯანი ირწმუნება, რომ სამმხრივი დეკლარაციის დებულებების უზრუნველსაყოფად, ყარაბაღის ეკონომიკურ რეგიონში ფართომასშტაბიანი პროვოკაციების აღსაკვეთად, სომხეთის შეიარაღებული ძალების მათი ტერიტორიებიდან გასაყვანად, ასევე, აზერბაიჯანის კონსტიტუციური სისტემის აღსადგენად, რეგიონში ანტიტერორისტული ღონისძიებები დაიწყეს.

  • გარდა ამისა, აზერბაიჯანის საგარეო საქმეთა სამინისტრომ განაცხადა, რომ ერთადერთი გზა რეგიონში მშვიდობისა და სტაბილურობის უზრუნველსაყოფად ეთნიკური სომეხი ჯარების სრული გაყვანა და სტეფანაკერტში მთავრობის დაშლაა.

სომხეთი აცხადებს, რომ აზერბაიჯანის ოფიციალურ შეტყობინებებსა და მედიაში კვლავ ჩნდება ყალბი მტკიცება იმის შესახებ, თითქოს მთიან ყარაბაღში სომხეთის რესპუბლიკის შეიარაღებული ძალების დანაყოფები, სამხედრო ტექნიკა და პერსონალია.

  • "არაერთხელ და ახლაც ვაცხადებთ, რომ სომხეთის რესპუბლიკას არ ჰყავს ჯარი მთიან ყარაბაღში", — აღნიშნეს მათ.