საქართველოს მოჭადრაკეთა ნაკრებმა 2023 წლის მსოფლიოს ქალთა გუნდური ჩემპიონატი მოიგო. ჩემპიონატი პოლონეთის ქალაქ ბიდგოშჩში ჩატარდა, საქართველოს ქალთა ნაკრებმა ფინალში ყაზახეთს ორი თამაში მოუგო და მსოფლიო ჩემპიონის ტიტულიც მოიპოვა.

საქართველოს ნაკრები შემდეგი შემადგენლობით ასპარეზობდა: ბელა ხოტენაშვილი (2423), მერი არაბიძე (2349), ნინო ბაციაშვილი (2366), ლელა ჯავახიშვილი (2342) და სალომე მელია (2267). ყაზახეთთან ფინალურ შეხვედრაში პირველი მატჩი 2,5:1,5 ანგარიშით დასრულდა და ქართველმა მოჭადრაკეებმა გამარჯვება მოიპოვეს. მეორე მატჩში კი საქართველოს ნაკრებმა 3,5:0,5 ანგარიშით მოიგო.

საქართველომ 2023 წლის ჭადრაკის მსოფლიოს ქალთა გუნდურ ჩემპიონატზე ოქროს მედალი მოიპოვა, ყაზახეთს ვერცხლის მედალი ერგო, მე-3 ადგილზე გასულ საფრანგეთს კი — ბრინჯაოს მედალი.

ეს პირველი შემთხვევა არ არის, როცა საქართველოს მოჭადრაკე ქალთა ნაკრები მსოფლიო ჩემპიონის ტიტულის მფლობელი გახდა. 2015 წელს სოჭში გამართულ შეჯიბრზე, რომელიც სხვა ფორმატში ჩატარდა, თუმცა ქართველ ქალთა ნაკრების შემადგენლობა იდენტური იყო, მოჭადრაკეებმა თასი მოიპოვეს.

მსოფლიო გუნდური ჩემპიონატის ნახევარფინალში საქართველოს ნაკრებმა აშშ-ის გუნდი 2,5:1,5 ანგარიშით დაამარცხა. შემდეგ კი აშშ საფრანგეთს შეხვდა, რაც საფრანგეთის გამარჯვებით დასრულდა.