ხანგრძლივი მოლოდინის შემდეგ, ლეგენდარული იაპონელი რეჟისორის, ჰაიაო მიაძაკის, უკანასკნელი ფილმის ტრეილერი გავრცელდა. ნამუშევარი, სახელწოდებით როგორ ცხოვრობ? (ინგლისურენოვან ვერსიას ბიჭი და ყანჩა ერქმევა), კინოკრიტიკოსებმა უკვე შეაფასეს "შედევრად"; თუმცა, აღსანიშნავია, რომ პრემიერამდე ფილმის შესახებ ფაქტობრივად არაფერი იყო ცნობილი, რადგან არც ტრეილერი გავრცელებულა და არც — სიუჟეტის აღწერა.

ახლა კი, როცა უკვე ტრეილერის ხილვის საშუალება მოგვეცა, შეგვიძლია დარწმუნებით ვთქვათ, რომ ეს ნამდვილად მიაძაკის ხელწერაა — ზღაპრისეულმა ვიზუალებმა შეიძლება რეჟისორის ოსკაროსანი ანიმე Spirited Away-ც კი მოგაგონოთ.

82 წლის რეჟისორმა და სტუდია ჯიბლის თანადამფუძნებელმა ჰაიაო მიაძაკიმ თავადვე განაცხადა, რომ კარიერას ასრულებს და ეს ფილმიც მისი ბოლო ნამუშევარია. ანიმეს სახელი აღებულია იაპონელი მწერლის, იოშინო გენძაბუროს, წიგნის სათაურიდან, თუმცა, ფილმის სიუჟეტი ნაწარმოებს არ ეფუძნება. აქ ამბავი მოზარდ ბიჭზეა, რომელიც თავის პატარა ქალაქში მიტოვებულ კოშკს აღმოაჩენს და მოლაპარაკე ყანჩასთან ერთად ჯადოსნურ სამყაროში აღმოჩნდება.

როგორ ცხოვრობ? იაპონელმა მაყურებელმა ივლისის თვეში იხილა. ფილმს აღფრთოვანებული გამოხმაურება მოჰყვა — 5 მილიონზე მეტი გაყიდული ბილეთით მან უკვე $52,6 მილიონი გამოიმუშავა.

საქებარი სიტყვები არ დაუშურებიათ კინოკრიტიკოსებსაც. "სრულყოფილი, მრავალშრიანი შედევრი ანიმეს ლეგენდისგან", — წერდა Time Out Japan.

"ფილმში ყველაფერი გარდასულ დღეთა მოგონების სევდას ერწყმის, სენტიმენტალურობისგან დაცლილ გააზრებას იმისა, რომ წარსული ვეღარ დაბრუნდება", — დაწერა Polygon-ის მიმომხილველმა სეზარი იან სტრუშიევიჩმა, — "ამ განწყობით კი რეჟისორმა თითქოს ბოლოჯერ შეავლო თვალი თავის შემოქმედებას ფარდის ჩამოფარებამდე".

ამერიკელი მაყურებელი მიაძაკის უკანასკნელ ნამუშევარს, სავარაუდოდ, წელსვე იხილავს. ეპოქალური რეჟისორის ახალი ფილმის ჩვენების უფლება სხვა რამდენიმე ქვეყანაშიც გაყიდულია უკვე.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...