საქართველოს საზოგადოებრივი მაუწყებლის მიმდინარე და ახალი ამბების ბლოკის დირექტორი გიორგი გვიმრაძე უსაფუძვლოს უწოდებს პრეტენზიებს იმასთან დაკავშირებით, რომ მაუწყებლის მაყურებელმა 12 საათის დაგვიანებით შეიტყო 2 ივლისის საღამოს ელიავას ბაზრობაზე მომხდარი ხანძრის შესახებ.

მედიაჩეკერმა დღეს დაწერა, რომ ხანძარი პირდაპირ ეთერში გააშუქა თითქმის ყველა ძირითადმა ტელემაუწყებელმა, გარდა საზოგადოებრივი მაუწყებლისა.

"მათგან განსხვავებით საზოგადოებრივი მაუწყებელი პრაქტიკულად ერთადერთი დიდი არხი აღმოჩნდა, რომელსაც ელიავას ბაზრობის ხანძარი 2 ივლისს არ გაუშუქებია. მაშინ, როცა აუდიტორია შემთხვევის ადგილიდან ჩართვებს სხვა არხებზე უყურებდა, საზოგადოებრივი მაუწყებლის პირველი არხის ეთერში ფეხბურთის მატჩის ტრანსლაცია გადიოდა".

გიორგი გვიმრაძე მიიჩნევს, რომ საზოგადოებრივი მაუწყებლის მიმართ არსებული პრეტენზია უსაფუძვლოა. ამის შესახებ მან პოსტი ფეისბუკზე გამოაქვეყნა:

"მედიაჩეკერი არასწორ ინფორმაციას ავრცელებს. ვწუხვარ ძალიან, პროფესიონალიზმის პრეტენზიის დროს, ასე არ უნდა გემართებოდეს. GPB - ასეთი ტელემაუწყებელი არ არსებობს და შესაბამისად, მას მაყურებელიც ვერ ეყოლება. არც საზოგადოებრივი მაუწყებელია ტელეარხი. საზოგადოებრივი მაუწყებლის სატელევიზიო არხს პირველი არხი ქვია. თუ რამე არ ხვდება პირველი არხის ეთერში, არ ნიშნავს, რომ საზოგადოებრივი მაუწყებლის ყურადღების ან გაშუქების მიღმა რჩება. გუშინ ჩვენი ჟურნალისტი დაშავდა და მისი პატივისცემა მაინც უნდა ეყოს მედიაჩეკერს, რომ არ თქვა საზოგადოებრივი მაუწყებლის მომხმარებელმა (დიახ, მომხმარებელმა) დაგვიანებით გაიგო მოვლენაო. არ ვიცი, რა სტანდარტით ხელმძღვანელობს. სხვა არხებს რატომ ადარებს, მოდი, გირჩევთ, ჩვენ რაც გვაქვს, ისინი გადაამოწმეთ სხვაგან.

ეს საზოგადოებრივია - ის რაც გვაერთიანებს, სხვათა შორის ყველა პლატფორმაზე. ჩემი ჟურნალისტი რომ არ დაშავებულიყო ოპერატიული გაშუქებისას, ამას არ დავწერდი. არ დავხარჯავდი დროს, მაგრამ არ მინდა მან ნახოს მხოლოდ მედიაჩეკერის არასწორი ინფორმაცია და პასუხი ვერ იხილოს. ნინ გელოდებით სამსახურში".

გიორგი გვიმრაძე მედიაჩეკერთან საუბარში აღნიშნავს, რომ რადგან კვირა დღე იყო, თანამშრომლები კი სახლში იყვნენ წასულები, პირდაპირი ჩართვის გაშვება ვერ მოხერხდა: „ამ დროს ფეხბურთის მატჩი გადიოდა, 15 წუთიან ჭრაში საინფორმაციოს გაშვება არ გამოვიდოდა. ხანძარი ისეთ დროს დაიწყო, რომ ვერ მოვასწრებდით საეთეროს მომზადებას. ასევე, კვირა დღე იყო და რადგან კვირა იყო, ხალხი სახლში იყო წასული, ვერ გავიდოდით ეთერში და ამიტომ არ გავედით. მე არც ვთვლი, რომ უნდა გავსულიყავით, სპეცი არ უნდა შეგვეყვანა, არ იყო “სასპეცე“ ამბავი. ეთერში რომ ვყოფილიყავით, ცხადია, გავაშუქებდით. გვაქვს ვებმაუწყებლობა და იქ ყველაფერი გავაკეთეთ, რაც უნდა გაკეთებულიყო“.

2 ივლისს ელიავას ბაზრობის 2 500 კვადრატული მეტრი ფართის ტერიტორია რამდენიმე საათის განმავლობაში იწვოდა. შემთხვევის შედეგად საავადმყოფოში გადაყვანა დასჭირდა ოთხ ადამიანს. საქმეზე დაწყებულია გამოძიება.