42 წლის წინ საავადმყოფოს თანამშრომლებმა მარია ანჟელიკა გონზალესს ჩვილი დაბადებისთანავე გამოართვეს, მოგვიანებით კი უთხრეს, რომ ის გარდაიცვალა. დედა-შვილი პირველად ერთმანეთს 42 წლის შემდეგ ჩილეში შეხვდა.

თაიდენმა ოჯახის მოძებნა რამდენიმე თვის წინ მას შემდეგ დაიწყო, რაც მედიაში ჩილეში არალეგალურად გაშვილებული ბავშვების ისტორიები წაიკითხა. მათ არასამთავრობო ორგანიზაცია Nos Buscamos-ის დახმარებით ოჯახებთან კავშირი აღადგინეს.

ორგანიზაციამ დაადგინა, რომ თაიდენი ჩილეს დედაქალაქ სანტიაგოს საავადმყოფოში ნაადრევად დაიბადა და ინკუბატორში მოათავსეს, შვილის წასაყვანად მისულ დედას კი უთხრეს, რომ ბავშვი გარდაიცვალა და მისი ცხედარი განადგურდა.

"საბუთები, რომლებიც გაშვილებისას მქონდა, ამბობს, რომ ცოცხალი ნათესავები არ მყოლია. ბოლო რამდენიმე თვეში კი გავიგე, რომ თურმე, დედა და ხუთი და-ძმა მყავს. როგორ უნდა ჩაეხუტო ადამიანს ისე, რომ დაკარგული 42 წელი აინაზღაურო?" — ამბობს თაიდენი მედიასთან.

თაიდენმა თქვა, რომ მთელ ამ პროცესში გამზრდელი მშობლები მხარს უჭერენ და ამ სიტუაციაში ისინიც მსხვერპლები აღმოჩნდნენ, რომელთაც ბავშვის შვილად აყვანისას მის წარსულზე არასწორი ინფორმაცია მიაწოდეს.

ორგანიზაცია Nos Buscamos-ის შეფასებით, 1970-იან და 1980-იან წლებში ჩილეს ოჯახებიდან მოტყუებით ათიათასობით ბავშვი წაიყვანეს და ქვეყნის გარეთ გააშვილეს. ბოლო ცხრა წლის განმავლობაში ორგანიზაციამ ოჯახი 450-ზე მეტი არალეგალურად გაშვილებულ ბავშვს აპოვნინა.

"ამ ბავშვებს ღარიბი ოჯახებიდან, ღარიბი ქალებისგან იტაცებდნენ, რომელთაც არ იცოდნენ, როგორ დაეცვათ თავი", — აღნიშნავს ორგანიზაციის წარმომადგენელი.

Nos Buscamos უკვე ორი წელია თანამშრომლობს გენეალოგიურ პლატფორმა MyHeritage-თან, რომელიც დნმ-ის უფასო ტესტირებას უტარებს ჩილეში გაშვილებულ ბავშვებსა და ჩილელ ოჯახებს, რომელთაც ეჭვი აქვთ, რომ მათი ნათესავი მოტყუებით გააშვილეს.

თაიდენის დნმ-ის ტესტმა დაადასტურა, რომ ის 100%-ით ჩილელია და მისი დნმ მისი ბიძაშვილისას დაემთხვა, რომელიც ამ პლატფორმას იყენებდა. თაიდენმა დედის სახელი და მისამართი იცოდა, რის მეშვეობითაც ბიძაშვილი ოჯახის პოვნაში დაეხმარა.

თაიდენის თქმით, როცა დედას მისწერა, გაიგო, რომ ის შვილს წლების განმავლობაში ეძებდა.

"შვილო, წარმოდგენაც არ გაქვს ღამეებზე, რომლებსაც ტირილსა და ლოცვაში ვათენებდი. ღმერთს ვთხოვდი, რომ სიკვდილამდე მომესწრო იმის გაგება, რა დაგემართა", — სწერდა მარია შვილს.

თაიდენი ცოლთან და შვილებთან ერთად ჩილეში ჩავიდა, რათა ოჯახს შეხვედროდა. დედის სახლში ჩასულს მას 42 სხვადასხვა ფერის ბუშტით დახვდნენ, რომლებიც დაკარგული წლების სიმბოლო იყო. კაცის თქმით, ამ ბუშტების გახეთქვა მისთვის ყველაფერ იმის დაბრუნებას ნიშნავდა, რაც წაართვეს.