დღეს, პირველ ივლისს, ევროპარლამენტის სტრასბურგის შენობაში, გერმანიის ყოფილი კანცლერის, ჰელმუტ კოლის სამგლოვიარო ცერემონიალი გაიმართა. Deutsche Welle-ს ცნობით, გერმანიის გამაერთიანებლად ცნობილ კოლს, მსოფლიო ლიდერები გამოემშვიდობნენ.

ცერემონიალზე დამსწრეთა შორის იყვნენ, გერმანიის ამჟამინდელი კანცლერი, ანგელა მერკელი და საფრანგეთის პრეზიდენტი ემანუელ მაკრონი, ასევე, რუსეთის პრემიერ-მინისტრი დმიტრი მედვედევი, აშშ-ის ყოფილი პრეზიდენტი ბილ კლინტონი და ესპანეთის ყოფილი პრემიერ- მინისტრი ფილიპე გონსალესი.

ფოტო: DPA/ M.Kappeler

მედვედევმა სიტყვით გამოსვლისას განაცხადა, რომ გერმანიამ და რუსეთმა ყველაზე კარგად იციან მშვიდობისა და გამანადგურებელი ომის ფასი: "კოლმა დაუღალავად იშრომა, რომ მშვიდობა გარანტირებული ყოფილიყო".

ფოტო: DPA / S.Hopper

ფოტო: AP

"ჰელმუტ კოლის გარეშე, იმ მილიონობით ადამიანის ცხოვრება, რომლებიც კედლის მიღმა ცხოვრობდნენ 1990 წლამდე, სრულიად განსხვავებული იქნებოდა, მათ შორის ჩემიც" - განაცხადა ანგელა მერკელმა.

ევროპარლამენტში მსგავსი ცერემონიალი პირველად გაიმართა და მისი ინიციატორი ევროკომისიის პრეზიდენტი ჟან კლოდ იუნკერია. სიტყვით გამოსვლისას მან ჰელმუტ კოლს თავისი მენტორი და მეგობარი უწოდა. ცერემონიალის პარალელურად სტრასბურგში 2000-მდე სამართალდამცავი იყო მობილიზებული.

ჰელმუტ კოლი 16 ივნისს, 87 წლის ასაკში გარდაიცვალა. ის 1982- 1998 წლებში, 16 წლის მანძილზე მართავდა ფედერაციულ რესპუბლიკას. მის სახელს უკავშირდება გერმანიის ორი ნაწილის, გერმანიის ფედერაციული და დემოკრატიული რესპუბლიკების გაერთიანება და ბერლინის კედლის დაცემა, ასევე საერთო ევროპული ვალუტის, ევროს შემოღება.