რა მოხდა: გუშინ, 27 ივლისს ბათუმში მოქალაქეებმა აქცია გამართეს. მათ რუსული საკრუიზო გემის Astoria Grande-ის ქალაქის პორტში შესვლა გააპროტესტეს.

  • "Русский корабль, иди на **й, აფხაზეთი საქართველოა", — ისმოდა შეძახილები.
  • აქციის მონაწილეებმა ადგილზე აფხაზეთისა და აგვისტოს ომის ამსახველი ფოტომასალა მიიტანეს.
  • მოქალაქეების პროტესტს გემზე მყოფი რუსი ტურისტები შეურაცხმყოფელ ჟესტებით შეხვდნენ.
  • მანამდე კი ზოგიერთი მათგანი მედიასთან პროკრემლისტურ რიტორიკას იმეორებდა და ანტიქართულ კომენტარებს აკეთებდა.
  • "ოკუპაციის შესახებ არ ვიცი, თქვენ ჩვენი რაღაც რესპუბლიკა იყავით, საკავშირო და არა ოკუპირებული. რუსეთი ოკუპანტი არ არის, ჩვენ რა, თქვენი ოკუპაცია მოვახდინეთ? ჩვენ გეხმარებოდით", — ამბობდა ერთ-ერთი მათგანი.
  • პარალელურად, აქციია გაიმართა თბილისში, პარლამენტთან.
  • პროტესტის ფონზე, რუსულმა საკრუიზო გემმა ბათუმი დატოვა.
  • თუმცა, Astoria Grande-ს საიტზე გამოქვეყნებული ინფორმაციით, მომდევნო რეისი 29 ივლისს იგეგმება, გემი კი ბათუმის პორტში 31 ივლისს აპირებს შემოსვლას.

სალომე ზურაბიშვილი აქციას დღეს გამოეხმაურა და დაწერა, რომ ამაყობს ხალხით, რომელმაც მშვიდობიანად გააპროტესტა რუსეთის ახალი პროვოკაცია.

  • "ვამაყობ ჩვენი ხალხით, რომელმაც მშვიდობიანად გააპროტესტა რუსეთის ახალი პროვოკაცია — რუსული საკრუიზო ლაინერის საქართველოში, ბათუმის პორტში შემოსვლა მაშინ, როდესაც პუტინი მარცვლეულის გადაზიდვებს ბლოკავს და შავ ზღვაში თავისუფალ ნაოსნობას აფერხებს", — აცხადებს ის.
  • პროტესტს გამოეხმაურა ქართული ოცნების თავმჯდომარე, ირაკლი კობახიძეც და რუსული გემის საქართველოში შემოსვლის მოწინააღმდეგე მოქალაქეების აქციას ქაჯობა უწოდა.
  • "ჩვენ, რა თქმა უნდა, ამას არ დავუშვებთ. ჩვენ არ გვჭირდება ქაჯური პოლიტიკა. ჩვენ გვჭირდება პრაგმატული, რაციონალური, სწორი პოლიტიკა ჩვენი ქვეყნისთვის და ეს არის ერთადერთი რეცეპტი იმისათვის, რომ საქართველომ შეინარჩუნოს მშვიდობა და ქვეყანას ჰქონდეს განვითარება", — ამბობს ის.