საზოგადოებრივი მაუწყებელი მულტიმედია ნიუსრუმისთვის რემონტს ატარებს. "ამორტიზებული შენობა", "შეუძლებელია რემონტის გაკეთება, ან ახალი სისტემების შემოტანა " - ასე შეაფასა არხის გენერალურმა დირექტორმა, ვასილ მაღლაფერიძემ, 6 თებერვალს, თბილისში, კოსტავას 68 ნომერში არსებული შენობა, რომელშიც ახლა სარემონტო სამუშაოები მიმდინარეობს.

On.ge დაინტერესდა, რატომ გადაწყდა საზოგადოებრივი მაუწყებლის ამორტიზებულ შენობაში, როგორც მას მაღლაფერიძე უწოდებდა თვეების წინ, ფინანსური რესურსის დახარჯვა სარემონტო სამუშაოებისთვის მაშინ, როცა დაგეგმილია ახალი შენობის აშენება და მაუწყებლის სხვა შენობის ათვისება. ამ საკითხთან დაკავშირებული კითხვების ნაწილი გენერალური დირექტორისთვის გაუგებარი აღმოჩნდა.

კითხავზე, შეიცვალა თუ არა რამე, მას შემდეგ, რაც მაუწყებლის ავარიული შენობისა და ამ შენობაში მუშაობის შეუძლებლობის შესახებ გავრცელდა ინფორმაცია, მაღლაფერიძე ამბობს, რომ მსგავსი დასკვნა არ ყოფილა. თუმცა, მან თანამდებობაზე მუშაობის დაწყებიდან ერთი თვის შემდეგ მაუწყებლის განვითარების ხედვა წარადგინა. ამ ხედვის ერთი ნაწილი მაუწყებლის შენობის მდგომარეობას შეეხებოდა (იხილეთ ვიდეო 05:47).

"უნდა გითხრათ, რომ იმ შენობაში, სადაც დღეს ჩვენ ახლა ვიმყოფებით, ჩვენ შევაფასეთ სპეციალისტებთან ერთად არანაირ ტექნოლოგიურ ჩარევას ვერ უძლებს. შეუძლებელია ან რემოტის გაკეთება, ან რაღაცა ახალი სისტემების შემოტანა, ან რამე სამუშაო პირობების შექმნა. შენობა არის ამორტიზებული, გადახრილი, ნგრევის პირას," - ამბობდა მაღლაფერიძე მაუწყებლის შენობის შესახებ.