აშშ-ში, ოჰაიოს შტატში მდებარე კოლუმბის ზოოპარკისა და აკვარიუმის თანამშრომლები ერთ მშვენიერ დილას ნანახმა სრულიად განაცვიფრა. ზოოპარკში ახალი ბინადარი გამოჩენილიყო — პატარა გორილა. თუმცა, საქმე ისაა, რომ ახალდაბადებული გორილას დედა მანამდე ყველას მამრი ეგონა.

8 წლის ახალბედა დედა, სახელად სალი, დაწესებულებაში 2019 წლიდან ცხოვრობს. ზოოპარკის თანამშრომლები ხსნიან, რომ იგი მათთან სრულიად ჯანმრთელი და ახალგაზრდა მოხვდა, ამდენად, არც სამედიცინო შემოწმება დასჭირვებია, რომ მისი სქესი უფრო ადრე აღმოეჩინათ. ამასთან, გორილების სასქესო ორგანოები ადვილად შესამჩნევი არაა, 8 წლის ასაკამდე კი მდედრი და მამრი ინდივიდები ერთმანეთს ძალიან ჰგვანან. ამიტომ, დაწესებულებაში ყველამ ანგარიშმიუცემლად ჩათვალა, რომ მათი ახალი ბინადარი მამრი იყო.

... ეს იქამდე, სანამ მომვლელები სალის ხელში აყვანილი ახალშობილი გორილით შენიშნავდნენ. გავრცელებულ პრესრელიზში ზოოპარკი წერს, რომ გორილების ნაშიერები ზომით ჩვილ ბავშვებზე უფრო პატარები არიან, ცხოველების ამ სახეობას კი მუცლის ნაწილი ისედაც მოზრდილი აქვს. ასე რომ, დაწესებულებაში სალის მაკეობაც გამოეპარათ.

კოლუმბის ზოოპარკის ახალი ბინადარი დედასთან, სალისთან, ერთად.

ფოტო: Columbus Zoo and Aquarium

რაც შეეხება ზოოპარკის ახალშეძენილ ბინადარს, ის სრულიად ჯანმრთელი პატარა გორილაა. დნმ-ტესტის საშუალებით მალე იმასაც გაარკვევენ, რომელია მისი მამა.

აღსანიშნავია, რომ გორილების ეს სახეობა, რომელიც კოლუმბის ზოოპარკში ცხოვრობს, გადაშენების საფრთხის ქვეშაა. გაუტყეურების და მათი ბუნებრივი ჰაბიტატის განადგურების გამო, ცენტრალურ აფრიკაში ამ სახეობის ინდივიდთა რაოდენობა 100 ათასამდეა შემცირებული.

სალის ჯერ კიდევ უსახელო პირმშო კი უკვე 34-ე გორილაა, რომელიც ოჰაიოს ზოოპარკში დაიბადა.