ბრიტანეთის ერთ-ერთი ფერმიდან გაქცეულმა ცხვრებმა ადგილობრივი მებაღეები შარში გახვიეს: ცხვრები ბაღში შეიპარნენ და ის ყვავილები შეჭამეს, რომლებიც მებაღეებს საკონკურსოდ ჰქონდათ გამზადებული. ყვავილები მებაღეობის ეროვნული კონკურსისთვის დარგეს და უვლიდნენ, თუმცა ცხვრებმა ნაწილი შეჭამეს, ნაწილი კი დაჭყლიტეს.

ბრიტანეთის ქალაქი როტენსტოლი მებაღეობის კონკურსში ყოველწლიურად მონაწილეობს და გასულ წელს ოქროს მედალიც მოიპოვა. თუმცა ფერმიდან გაქცეულმა სხვებმა წლევანდელი საკონკურსო ყვავილები გაანადგურეს, რომელთა ღირებულებაც დაახლოებით $1500-ია.

ფოტო: BBC

ცხვრები ქალაქიდან მოშორებით მდებარე ფერმაში ცხოვრობენ. როგორც გაირკვა, ერთ-ერთ ფერმებს ჭიშკარი შემთხვევით ღია დარჩა, ცხვრებმა კი დრო იხელთეს და ქალაქისკენ გაიქცნენ. მებაღეების თქმით, მაქსიმალურად ცდილობენ, რომ ცხვრების მიერ მიყენებული ზიანი გამოასწორონ.

მებაღეების თქმით, ჯერ კიდევ არის შანსი, რომ შეჯიბრამდე ახალი ყვავილების გაზრდა მოასწრონ. თუმცა იმედოვნებენ, რომ ცხვრები ყვავილებს ისევ არ დაესხმებიან თავს.