რატომ არის მნიშვნელოვანი: 2022 წლის მარტში ცნობილი გახდა, რომ ქართული ოცნების დამფუძნებელმა, ბიძინა ივანიშვილმა შვეიცარიულ ბანკს Credit Suisse-ს ბერმუდის სასამართლოში $600-მილიონიანი დავა მოუგო.

  • სასამართლო გადაწყვეტილების შედეგად, ბანკს ივანიშვილისთვის თანხის ანაზღაურება დაეკისრა.
  • ივანიშვილი ჩიოდა თანხის გადაცემის შეფერხებაზე, რაც ბანკმა აღმოსავლეთ ევროპაში არსებული გეოპოლიტიკური გარემოთი ახსნა, შემდეგ კი ივანიშვილს ევროპარლამენტის რეზოლუციაზე კითხვები გაუგზავნა.
  • გარდა ამისა, საქმე მიმდინარეობდა სინგაპურის სასამართლოშიც, რომელმაც Credit Suisse Trust Limited-ს მოსარჩელეების სასარგებლოდ 926 მილიონი აშშ დოლარის გადახდა დააკისრა.

დეტალები: იურიდიული ფირმა მეტრიკას განცხადებით, ბერმუდის სააპელაციო სასამართლოს გადაწყვეტილებით უცვლელი დარჩა პირველი ინსტანციის გადაწყვეტილება, რომლის მიხედვითაც, Credit Suisse-ის შვილობილ კომპანიას ბიძინა ივანიშვილის ოჯახის სასარგებლოდ 607 მილიონი აშშ დოლარის გადახდა დაეკისრა.

  • "Credit Suisse-ის ტრასტი მაქსიმალურად შეეცადა, გაეჭიანურებინა სასამართლო პროცედურებიც. ფაქტიურად, ერთი წლის თავზე (2023 წლის 24 მარტი) დადგა ის შედეგი, რომელიც თავიდანვე პროგნოზირებადი იყო და რომლის სასამართლოში განსახილველად მხოლოდ ერთი სხდომა იყოს საჭირო; ერთ სხდომაში მოხდა კიდეც საქმის განხილვა", — წერენ ადვოკატები.
  • მათივე თქმით, მოსარჩელეებისთვის აქტივების გადაცემას ამერიკული და დასავლეთ ევროპის ფონდები აფერხებენ.
  • "აღნიშნული კი, თავის მხრივ, ნიშნავს, რომ 2022 წლის მარტიდან ანუ, როგორც Credit Suisse-ის ტრასტი აღნიშნავდა, "აღმოსავლეთ ევროპაში მიმდინარე გეოპოლიტიკური მოვლენებიდან" ბიძინა ივანიშვილს და მის ოჯახის წევრებს ფაქტიურად შეზღუდული აქვთ თავიანთი აქტივების გარკვეულ ნაწილზე წვდომა", — ვკითხულობთ მეტრიკას განცხადებაში.