პარტია ქართული ოცნება პირველ ივლისს პოლიტსაბჭოს სხდომას მართავს, რის შემდეგაც თბილისის მერობის კანდიდატად ოფიციალურად წარადგენენ ენერგეტიკის მინისტრ კახა კალაძეს.

საპარლამენტო უმრავლესობის წევრი, გია ვოლსკი მიიჩნევს, რომ კალაძე გაიმარჯვებს:

"არამგონია, რომ მეორე ტური იქნება საჭირო, კახა საკმაოდ კარგი, გამოცდილი მეურნეა. მისი საქმიანი თვისებები სრულად შეესაბამება იმ ამოცანებს, რაც ქალაქის წინაშე დგას".

რუსთავი 2-სთვის მიცემულ ინტერვიუში კალაძის შანსებზე ისაუბრა უმრავლესობის კიდევ ერთმა წევრმა, არჩილ თალაკვაძემაც: "კახი არის ჩვენი გუნდის ერთ-ერთი ძლიერი ფორვარდი და რა თქმა უნდა, მისი განხილვა ამ პოზიციაზე არის ძალიან რეალური, მას აქვს დიდი შანსები და მას აქვს დიდი შესაძლებლობები, რომ იყოს წარმატებული მერი".

საქართველოში ადგილობრივი თვითმმართველობის არჩევნები 2017 წლის ოქტომბრის მიწურულს გაიმართება. ჯერჯერობით, ოფიციალურად დასახელებული კანდიდატები არიან ზაალ უდუმაშვილი ერთიანი ნაციონალური მოძრაობიდან და ელენე ხოშტარია ევროპული საქართველოდან.