USAID ახალგაზრდების გაძლიერებით შესაძლებლობას აძლევს მათ, გახდნენ ლიდერები დემოკრატიული ცვლილებების პროცესში, შეიძინონ ახალი უნარ-ჩვევები, მიიღონ გამოცდილება და გააძლიერონ დემოკრატიული ღირებულებები თავიანთ თემსა და ქვეყანაში.

ირინა მიქავა ბოლნისში მოწვეული სამოქალაქო განათლების მასწავლებელია, სადაც ახალგაზრდებთან ერთად სამოქალაქო განათლების კლუბი — Peak Of Changes და ბოლნისის ახალგაზრდული სივრცე / Bolnisi Youth Space ჩამოაყალიბა, რომელიც დაფუძნდა EU4Youth პროგრამის ფარგლებში.

ირინა ქვემო ქართლის რეგიონში თანასწორობის ელჩიცაა, გეგმავს და ახორციელებს ტოლერანტობის, თანასწორობის, ადამიანის უფლებების შესახებ აქტივობებს საქართველოს მოქალაქე აზერბაიჯანელ და ქართველ ახალგაზრდებთან.

ამასთანავე, 2020-2022 წლებში, USAID-ის მიერ მხარდაჭერილი ინიციატივის ფარგლებში, იყო ახალგაზრდა ლიდერთა სკოლის მონაწილე.

"აღნიშნულ პროექტზე მიღებულმა გამოცდილებამ განსაზღვრა ჩემი მომავალი საქმიანობა, რომელიც დაკავშირებულია ახალგაზრდებთან, მოსწავლეებთან და სტუდენტებთან. დღეს მე ძალიან კარგად მესმის ახალგაზრდული აქტიურობის ხმა, რომელიც არის ცვლილების გაბედული სურვილი და ყოველდღიური მუშაობა უკეთესი, ევროპული სახელმწიფოსთვის", — ამბობს ირინა.

ფოტო: USAID

2023 წლის 23 მარტს ირინა USAID-ისა და სამოქალაქო განათლების პედაგოგთა ფორუმის ერთობლივი ჯილდოს, ქვემო ქართლის წლის წარმატებული სამოქალაქო განათლების პედაგოგის სტატუსის მფლობელი გახდა. ასევე, ირინა ევროპული დემოკრატიის ახალგაზრდული ქსელის (EDYN) წევრიცაა, რომელიც 23 ქვეყნის 560 სამოქალაქო ლიდერსა და პოლიტიკოსს აერთიანებს და მხარდაჭერილია USAID-ის, საერთაშორისო რესპუბლიკური ინსტიტუტისა (IRI) და ეროვნულ-დემოკრატიული ინსტიტუტის (NDI) მიერ.

"USAID-ის როლი ამ წარმატებული ახალგაზრდული თუ პროფესიული საქმიანობის ისტორიაში უდიდესია, კომპეტენციების დახვეწის, განვითარებისა და მხარდაჭერის კუთხით. თუ დღეს სხვას ვასწავლით იმას, რაც ვიცით, ამაში თავის დროზე სწორედ USAID დაგვეხმარა, ახლა კი უბრალოდ ვაზიარებთ ცოდნას და ვქმნით თანასწორი შესაძლებლობების პლატფორმებს სხვებისთვის".