Vetements-ის აღმასრულებელმა და შემოქმედებითმა დირექტორმა, გურამ გვასალიამ, ახლახან New York Times-თან ვრცელი ინტერვიუ ჩაწერა. გურამ გვასალიამ მადონასთან Vetements-ის პარტნიორობაზე ისაუბრა, შემდეგ კი თავისი ძმის, დემნას, კარიერული მიღწევებისა და მასთან ურთიერთობის შესახებაც რამდენიმე კომენტარი გააკეთა.

სოციალურ ქსელებში გურამ გვასალიასა და მადონას ერთობლივი ფოტოები რამდენიმე დღის წინ გავრცელდა. ინტერვიუში კი გურამ გვასალიამ აღნიშნა, რომ ბოლო 5 თვეა, მადონას სამომავლო ტურნესთვის სამოსს თავად ქმნის. გურამის თქმით, მომღერალთან მუშაობა მისთვის დიდი პრივილეგია და პატივია. "ვფიქრობ, რომ მადონასთან მუშაობა გარკვეულ აღიარებას მომიტანს", — ამბობს ქართველი დიზაინერი.

New York Times-ის ჟურნალისტის, ვანესა ფრიდმანის შეფასებით, Vetements-ის ახალმა კოლექციამ და მადონასთან მუშაობამ გურამ გვასალია ძმის ჩრდილიდან შეიძლება საბოლოოდ გამოიყვანოს. ინტერვიუში ქართველმა დიზაინერმა ძმასთან ურთიერთობაზეც ისაუბრა.

"ჩემი ძმა ჩემზე 6 წლით უფროსია. როცა მე მეორე კლასში ვიყავი, ის მერვეში იყო. გარკვეული შესაძლებლობები მან ცხოვრებაში უფრო ადრე მიიღო. მაგრამ თუ გავითვალისწინებთ, სად ვარ მე ახლა და სად იყო ჩემი ძმა ჩემს ასაკში, ვფიქრობ, რომ მასზე გაცილებით წინ ვარ", — ამბობს გურამ გვასალია დემნას შესახებ.

შეგახსენებთ, რომ Vetements დემნამ და გურამ გვასალიამ 2013 წელს დააარსეს. ბრენდმა წარმატებას მალევე მიაღწია და პოპულარულიც გახდა, თუმცა დემნამ 2019 წელს Vetements დატოვა და განაცხადა, რომ Vetements-ში თავისი მისია უკვე შეასრულა. ამის შემდეგ დემნამ კარიერული მოღვაწეობა ბალენსიაგაში გააგრძელა, მედია კი ძმებს შორის უთანხმოებაზე დიდხანს ლაპარაკობდა.

"ვფიქრობ, რომ ჩემი ძმა ძალიან ნიჭიერია, მაგრამ მთელი რიგ საკითხებთან დაკავშირებით მე განსხვავებული მიდგომა მაქვს. მისი ეპოქა ნელ-ნელა დასასრულისკენ მიდის, ახლა ჩემი დროა. ჩემს ძმას უკვე დიდი სახელი აქვს და ჩემს ცხოვრებაში მისი არსებობა კიდევ უფრო დიდი გამოწვევაა. არ არის საკმარისი, რომ უბრალოდ კარგი ვიყო. მჭირდება, რომ ძალიან კარგი ვიყო", — დასძინა გურამ გვასალიამ.

იმის დასტურად, რომ ხშირად ცნობილი ადამიანების უმცროსი დედმამიშვილები მეტ წარმატებას უფრო გვიან აღწევენ, გურამ გვასალიამ კარდაშიანებისა და ჩოგბურთელი უილიამსების მაგალითები მოიყვანა.

"ვფიქრობ, კარდაშიანები კარგი მაგალითია. არსებობს კიმი, რომელიც შესანიშნავი და ფენომენალური ადამიანია — და არსებობს კაილიც. კაილი ახალგაზრდა თაობას წარმოადგენს და იგი ძალიან წარმატებულია სექსის ვიდეოების და იმ ყველაფრის გარეშეც, რისი გამოვლაც მის დას მოუწია. კიდევ ერთი მაგალითია ვინუს და სერენა უილიამსები. ორივე ფანტასტიკურია, მაგრამ რატომღაც დადგა მომენტი, როცა სერენამ მეტ წარმატებას მიაღწია", — ამბობს გურამ გვასალია.

შეგახსენებთ, რომ დემნამ გვარის გამოყენებაზე უარი 2021 წელს განაცხადა. ჟურნალისტ ვანესა ფრიდმანის თქმით, გურამს არ უნდოდა, ამ ინტერვიუსთვის დემნაც ჩაეწერათ. New York Times ინტერვიუს შესახებ დემნას მაინც დაუკავშირდა, თუმცა მან უარი განაცხადა.