რუსთავი 2-ის გადაცემა განსხვავებული აქცენტების წამყვანმა ეკა კვესიტაძემ, ტექნოპარკში მიმდინარე შეხვედრაზე, ბიძინა ივანიშვილს რუსთავი 2-ის სასამართლო პროცესის შეფასება სთხოვა:

"თქვენი აზრი მაინტერესებს, ქვეყნის ინტერესებიდან გამომდინარე, რუსთავი 2-ის პროცესს უნდა დამთავრდეს არჩევნებამდე თუ არჩევნების შემდეგ. ანუ ჩვენ არჩევნებს უნდა შეხვდეთ რუსთავი 2-ით, იმ ფორმით რომლითაც დღეს ის არსებობს თუ არა?"

ივანიშვილის თქმით, მისი სურვილია, რომ კი, არჩევნებს რუსთავი 2-ის არსებული ფორმით უნდა შევხვდეთ.

"თქვენი დირექტორი ძალიან ხშირად უხეშ სიტყვებს ხმარობს და უზრდელობს და იმიტომ გამოაძევეს დარბაზიდან", განაცხადა ივანიშვილმა. "მე არ მინდოდა ეს გამეხსენებინა, რამეთუ მე არ ვაპირებ სასამართლო ქმედების შეფასებას".

მისი თქმით, ის ძალიან იშვიათად აკვირდება პროცესს და ეცნობა მხოლოდ ამონარიდებს.

მისივე შეფასებით, ამჟამინდელი პროცესები განსხვავდება წინა ხელისუფლების ქმედებებისგან. ივანიშვილმა პარალელი რუსთავი 2-სა და იმედს შორის გაავლო და განაცხადა, რომ ახლა მიდის სამართლებრივი დავა, განსხვავებით იმედის შემთხვევისა, როდესაც ჟურნალისტები ძირს ეყარნენ, რაც იყო წინა ხელისუფლების ხელწერა.

"გვარამია გახლდათ მთავარი პროკურორის მოადგილე, როცა იმედის ჟურნალისტები იატაკზე გართხმულები იყვნენ და ტელევიზია წაიღეს. დღეს გამოდის და თავისუფალი მედიის სიმბოლოდ ქცეულ რუსთავი 2-ს იცავს გვარამია."

ივანიშვილის თქმით, ამჟამად ტელევიზიის მენეჯმენტის შეცვლა მისთვის მიუღებელია და ქვეყნის ინტერესებისთვისაც საზიანო იქნება:

"ეს არ არის სწორი, რამეთუ ამას, ევროპასა და ამერიკაში ვერავინ სწორად ვერ გაიგებს".

ივანიშვილი ამერიკის ელჩის წერილსაც გამოეხმაურა და განაცხადა, რომ იან კელის წერილი მისასალმებელია და გასაზიარებელი. რადგან ამერიკას ძალიან სურს, რომ ჩვენი ქვეყანა სწორი მიმართულებით განვითარდეს.

მენეჯმენტის ცვლილებასთან დაკავშირებით, ივანიშვილმა განაცხადა, რომ ის ფინანსურ გარანტად დაუდგება ხალვაშს ან დვალს და სთხოვს, რომ თუ სასამართლო არჩევნებამდე დასრულდა არ შეეხონ რუსთავი 2-ის მენეჯმენტს.

"თუ რამე ფინანსური ზარალი იქნება, მე ავანაზღაურებ და ვთხოვ, რომ თუ სასამართლო არჩევნებამდე დასრულდა, არჩევნებამდე არ შეეხონ გვარამიას და მენეჯმენტს. და საფასურად, ჩემგან, მოითხოვონ რაც უნდათ, ოღონდაც ეგ სალაპარაკოდ არ დაგიტოვონ თქვენ".