ამ წუთებში საქართველოს ბანკის მხარდაჭერით გამართული აქსელერაციის პროგრამა 500 Georgia-ს დემო დღის ღონისძიება მიმდინარეობს, რომელშიც მეოთხე ნაკადში მოხვედრილი 12 სტარტაპის დამფუძნებელი იღებს მონაწილეობას.

თითოეული მათგანი დღეს საკუთარ ბიზნესს წარადგენს და ეცდება, ინვესტორები დააინტერესოს.

აქსელერაციის პროგრამაში ჩართული კომპანიები წელს 7 სხვადასხვა ქვეყნიდან არიან, მათ შორის, რა თქმა უნდა, საქართველოდანაც. ეს სტარტაპებია: Arena Games, Bilimber, DataMind, Dealpad, Deskntea, Emonomy, Fortu Wealth, Glorri, Murmur, OneApp, Squares, და Uteach.

დამსწრე საზოგადოებისა და ინვესტორების წინაშე პირველი DataMind წარდგა, რომელიც ბანკებს ეხმარება შეაგროვონ, შეინახონ, მართონ და აწარმოონ მონაცემები მისი Data Warehouse სერვისის მეშვეობით. ეს შესაძლებლობას აძლევს მომხმარებელს, გამოიყენოს ყველა არსებული მონაცემი, დაჯგუფებისა და დროის შეზღუდვის გარეშე. გასულ წელს მათი 1 მილიონ აშშ დოლარზე მეტი შემოსავალი ჰქონდათ და, როგორც სპიკერმა აღნიშნა, ეს ამ ქართული სტარტაპისთვის მხოლოდ დასაწყისია.

ასევე, უკვე მოვისმინეთ Dealpad-ისა და Bilimber-ის გამოსვლები. პირველი გახლავთ გაყიდვების გუნდებისთვის შექმნილი პლატფორმა, რომელიც მათ კლიენტებზე წვდომას უადვილებს და კავშირის დამყარებაში ეხმარება. მეორე 6-12 კლასის მოსწავლეებს შესაძლებლობას აძლევს, სულ რაღაც ერთ წუთში დაუკავშირდნენ საუკეთესო რეპეტიტორებს. ასევე, აანალიზებს მათ პროგრესს და მონაცემთა უდიდეს ბაზას სთავაზობს.

მეტის გასაგებად, თვალი ადევნეთ პირდაპირ ტრანსლაციას:

სილიკონ ველიზე დაფუძნებული ვენჩურული საინვესტიციო კომპანია 500 Global-ის პროგრამის დაწყების შემდეგ მსოფლიო დონის მენტორებთან ერთად ინტენსიური ტრენინგი უკვე ათობით ქართულმა და უცხოურმა სტარტაპმა გაიარა. 500 Global ინვესტიციას დებს სტარტაპებში, რომლებიც სწრაფად მზარდ ტექნოლოგიურ კომპანიებს ქმნიან. ის მჭიდროდ თანამშრომლობს ეკოსისტემის მთავარ მონაწილეებთან და კონსულტაციას უწევს მთავრობებს, შექმნან ისეთი სამეწარმეო ეკოსისტემა, რომელშიც სტარტაპებს სწრაფი განვითარების შესაძლებლობა ექნებათ.