რა მოხდა: დღეს დილით რუსეთის დედაქალაქსა და მის შემოგარენს მყუდროება დაერღვა და აფეთქებების ხმამ შეაწუხა.

  • მალევე სოციალური ქსელები შეშფოთებული რუსების ვიდეოებმა მოიცვა.
  • კრემლის მედია წერდა, რომ საცხოვრებელ სახლებს უპილოტო საფრენი აპარატები დაეჯახა.
  • RBC, შინაგან საქმეთა სამინისტროსთან დაახლოებულ წყაროებზე დაყრდნობით იუწყებოდა, რომ მოსკოვსა და მოსკოვის რეგიონში 10-ზე მეტი დრონი ჩამოაგდეს
  • ტელეგრამ არხი Shot წერდა, რომ თავდასხმაში 32 დრონი მონაწილეობდა — მათგან 19 ჩამოაგდეს მოსკოვის მისადგომებთან, დაახლოებით 10 ხეებში გაიხლართა, სამი კი საცხოვრებელ კორპუსს შეეჯახა.
  • რა თქმა, უნდა გაცილებით ნაკლებ, 8 დრონზე საუბრობს რუსეთის თავდაცვის სამინისტრო.
  • ჟურნალისტი ფარიდა რუსტამოვა აცხადებდა, რომ, სავარაუდოდ, ერთ-ერთი დრონი მოსკოვის მახლობლად სოფელ რაზდორის თავზე ჩამოაგდეს, ანუ პუტინის რეზიდენციიდან არც თუ ისე შორს.

რა თქვეს რუსეთში: დედაქალაქის მერმა, სერგეი სობიანინმა განაცხადა, რომ თავდასხმისას რამდენიმე შენობა დაზიანდა და სერიოზულად არავინ დაშავებულა.

  • თავდაცვის სამინისტრომ ხელი მაშინვე "კიევის რეჟიმისკენ" გაიშვირა, ამას ტერორისტული ოპერაცია უწოდა და უმკაცრესი ზომებით დაემუქრა.
  • მათი მტკიცებით, 8 საფრენი აპარატიდან 3-მა ჩამხშობი სისტემის გამო გადაუხვია სამიზნეებს, 5 კი ჩამოაგდეს.
  • მათი მათემატიკური გათვლებიდან გაქრა ის დრონები, რომელიც კორპუსს შეეჯახა.
  • როგორც მედუზა წერს, სახელისუფლებო მედიებს დაავალეს, რომ თავდასხმის გაშუქებისას ხაზი გაესვათ, რამდენად წარამტებულად იმუშავა საჰაერო სისტემამ.

რა უპასუხეს უკრაინაში: პრეზიდენტის ადმინისტრაციის უფროსის მრჩეველმა, მიხაილო პოდოლიაკმა იხუმრა, რომ ხელოვნური ინტელექტის ეპოქაში ვართ და შესაძლოა, "ზოგიერთი დრონი არ იყო მზად უკრაინას დასხმოდა თავს", ამიტომ ხელმძღვანელებს დაუბრუნდა და კითხვა დაუსვა, რატომ გზავნიან უკრაინელ ბავშვებზე და კიევზე შესატევად.

  • მან ხაზი გაუსვა, რომ ყველა ცდება, ვისაც ჰგონია, ცალმხრივ თამაშს ითამაშებს და სუვერენულ სახელმწიფოს დაუსჯელად დაესხმება თავს.
  • ნახეთ თავდასხმის კადრები, რომელიც მედუზამ გააერთიანა.

რას ამბობს პუტინი: რუსეთის პრეზიდენტი ცდილობს ისე წარმოაჩინოს, თითქოს მოსკოვზე თავდასხმა კიევის საპასუხო ნაბიჯია.

  • ამბობს, რომ რამდენიმე დღის წინ დაარტყეს გადაწყვეტილების მიმღებ ცენტრებს, უკრაინის სამხედრო დაზვერვის შტაბს, რასაც კიევმა "რუსეთის დაშინების მცდელობით" უპასუხა.
  • "რუსეთის მოქალაქეების დაშინებისა და საცხოვრებელ კორპუსებზე დარტყმის მცდელობის გზა. ეს, რა თქმა უნდა, ტერორისტული საქმიანობის აშკარა ნიშანია", — ამბობს ადამიანი, რომლის ბრძანებითაც უკრაინაში წელიწადზე მეტია ბომბავენ მშვიდობიან დასახლებებს.
  • დედაქალაქში ათეულობით საფრენი აპარატის შეღწევის შემდეგაც, ამტკიცებს, თითქოს საჰაერო თავდაცვის სისტემამ გამართულად იმუშავა, მაგრამ არის საკითხები, რაზეც უნდა იმუშაონ.
  • იქვე თავისი "წუხილებიც გაამხილა", ვითომ საპასუხო რეაქცია ადარდებს:
  • "ეს იმდენად არ მაწუხებს, რამდენადაც რუსეთის მხრიდან პასუხის გამოწვევის მცდელობა. როგორც ჩანს, ეს გათვლილია: ისინი ჩვენს პროვოცირებას ცდილობენ სარკისებურ ქმედებებზე. ვნახოთ, რას ვუზამთ ამას", — თქვა მუქარანარევად პუტინმა და დაამატა:
  • "კიდევ ერთხელ ვიმეორებ: ჩვენს დედაქალაქში საჰაერო თავდაცვის სისტემამ გამართულად იმუშავა. არის რაღაც, რაზეც საჭიროა მუშაობა, მაგრამ კიდევ ერთხელ ვიმეორებ: ჩვენ ვიცით, რა უნდა გაკეთდეს".