რატომ არის მნიშვნელოვანი: დამოუკიდებლობის დღის აღსანიშნავად დღეს თავისუფლების გამზირზე ოფიციალური ღონისძიებები გაიმართა.

  • ღონისძიება 11 საათზე დაიწყო, თუმცა მედია ადგილზე 09:30-ზე იყო დაბარებული.
  • ჟურნალისტები სცენიდან შორს, გვერდითა მხარეს, ჯებირებს მიღმა დააყენეს, საიდანაც სიტყვით გამომსვლელების გადაღება შეუძლებელი იყო — ამიტომ მედია საერთო სიგნალით სარგებლობდა.
  • მსგავს პრაქტიკას მთავრობა უკვე რამდენიმე წელია იყენებს, თუმცა აქამდე ამ გამოყოფილ ადგილას ჟურნალისტებთან მთავრობის წარმომადგენლები მიჰყავდათ და მათი ჩაწერის საშუალება იყო.

რა მოხდა: დღეს, როცა თავდაცვის მინისტრი "კომენტარზე დადგა", მედიამ მას კითხვები ვერ დაუსვა, რადგან ჟურნალისტებს ჯებირებს მიღმა მოუწიათ დარჩენა.

  • პრესსამსახურის წარმომადგენლებმა მათ მიკროფონები და ტელეფონები გამოართვეს, ჯუანშერ ბურჭულაძის საუბარი ჩაუწერეს და უკან დაუბრუნეს.
  • ტელევიზიის ოპერატორებმა კომენტარის გადაღება ვიდეო კამერებით შეძლეს, თუმცა ონლაინ მედიისთვის, რომელიც ძირითადად ტელეფონით იღებს და აშუქებს, ეს შეუძლებელი აღმოჩნდა, რადგან მინისტრი ძალიან შორს იდგა.

ფოტო: თათია შურღაია / On.ge

დეტალები: საქართველოს ჟურნალისტების ეთიკის ქარტია აცხადებს, რომ ჟურნალისტების ერთ-ერთი მთავარი დანიშნულება მწვავე და კრიტიკული კითხვების დასმაა, განსაკუთრებით პოლიტიკური თანამდებობის პირებისთვის და არა პოლიტიკოსებისთვის სასურველი ინფორმაციის გავრცელება კითხვების დასმის გარეშე.

  • მათი შეფასებით, მსგავსი პრაქტიკა ხელს უშლის მედიის სრულფასოვან მუშაობას და შესაბამისად, საზოგადოების ინფორმირებას.
  • "მნიშვნელოვანია, რომ ყველას, განსაკუთრებით კი საჯარო პირებს, ესმოდეს მედიის როლი დემოკრატიულ სახელმწიფოში. მედიის როლი საზოგადოების ინფორმირებაა — პოლიტიკური თანამდებობის პირებმა პატივი უნდა სცენ საზოგადოების უფლებას, მიიღოს ინფორმაცია და უპასუხონ დასმულ კითხვებს", — ვკითხულობთ განცხადებაში.