უკრაინა რუსეთს ალყაში მოქცეულ ქალაქ ბახმუტზე ფოსფორის საბრძოლო მასალით თავდასხმაში ადანაშაულებს.

რატომ არის მნიშვნელოვანი: თეთრი ფოსფორის იარაღი აკრძალული არ არის, მაგრამ მისი სამოქალაქო ტერიტორიებზე გამოყენება სამხედრო დანაშაულად ითვლება.

  • შედეგად ჩნდება სწრაფად გავრცელებადი ცეცხლი, რომლის ჩაქრობაც საკმაოდ რთულია.
  • რუსეთი არაერთხელ დაადანაშაულეს თეთრი ფოსფორის გამოყენებაში მას შემდეგ, რაც გასულ წელს უკრაინაში შეიჭრა, მათ შორის, მარიუპოლის ალყის დროს.

დეტალები: უკრაინის სამხედროების მიერ გავრცელებულ კადრებში ჩანს, როგორ წვიმს თეთრი ფოსფორი ქალაქში.

  • უკრაინის თავდაცვის სამინისტრომ Twitter-ზე დაწერა, რომ ფოსფორის თავდასხმა მიზნად ისახავდა ცეცხლგამჩენი საბრძოლო მასალებით ბახმუტის არაოკუპირებული ტერიტორიების განადგურებას.

კონტექსტი: თავდასხმა მას შემდეგ მოხდა, რაც ვაგნერის გასამხედროებული ჯგუფის მეთაურმა განაცხადა, რომ 10 მაისს ბახმუტიდან ძალებს გაიყვანს საბრძოლო მასალის მომარაგების არქონის გამო.

  • რუსეთი თვეების განმავლობაში ცდილობს ბახმუტის ხელში ჩაგდებას, მიუხედავად მისი საეჭვო სტრატეგიული ღირებულებისა.
  • დასავლელი ოფიციალური პირების შეფასებით, ქალაქზე თავდასხმის შედეგად ათასობით რუსი ჯარისკაცი დაიღუპა.

თეთრი ფოსფორი არის ცვილის მსგავსი ნივთიერება, რომელიც ჟანგბადთან შეხებისას ინთება კვამლის კაშკაშა ნაკადს ქმნის.

  • ის იწვის 800 გრადუს ცელსიუსზე და შეიძლება გამოიწვიოს ადამიანის ხორცის უკიდურესი დამწვრობა.
  • ასევე, ნივთიერება წებოვანი და ძნელად მოსაშორებელია, რომელიც სახვევების მოხსნისას შეიძლება ხელახლა აალდეს.