კრემლის განცხადებით, შენობაზე თავდასხმა 3 მაისის ღამეს ორმა უპილოტო თვითმფრინავმა სცადა. რუსეთის ხელისუფლებამ ამაში "კიევის რეჟიმი" დაადანაშაულა და საპასუხო ქმედებები დააანონსა.

გამოხმაურებები: უკრაინის პრეზიდენტის პრესმდივანმა, სერხი ნიკიფოროვმა მედიისთვის მიცემულ კომენტარში განაცხადა, რომ უკრაინა არ უტევს უცხო ქვეყნის ტერიტორიებს.

  • "ჩვენ არ გვაქვს ინფორმაცია კრემლზე ე.წ. ღამის თავდასხმების შესახებ. მაგრამ, როგორც პრეზიდენტმა ზელენსკიმ არაერთხელ განაცხადა, უკრაინა ყველა ხელმისაწვდომ ძალასა და საშუალებას მიმართავს საკუთარი ტერიტორიების განთავისუფლებისაკენ და არა სხვებზე თავდასხმისკენ", — აღნიშნა მან.
  • ის ასევე გამოეხმაურა რუსეთის პრეზიდენტის პრესსპიკერის ბრალდებას, რომელმაც კრემლზე თავდასხმა "ტერორისტულ აქტად" შერაცხა.
  • "ტერორისტული თავდასხმა არის დნეპრისა და უმანში სახლების დანგრეული შესასვლელი ან კრამატორსკში რკინიგზის სადგურზე სარაკეტო თავდასხმა და მრავალი სხვა ტრაგედია. და ის, რაც მოსკოვში მოხდა, აშკარად არის სიტუაციის ესკალაცია 9 მაისამდე. მოსალოდნელი ქცევა ჩვენი ოპონენტებისგან", — განაცხადა ნიკიფოროვმა.

მიხაილ პოდოლიაკმა, უკრაინის პრეზიდენტის აპარატის ხელმძღვანელის მრჩეველმა განაცხადა, რომ უკრაინას "რა თქმა უნდა, არაფერი აქვს საერთო კრემლზე უპილოტო თვითმფრინავების თავდასხმებთან".

  • პოდოლიკის შეფასებით, რუსეთს ეშინია უკრაინის მოახლოებული კონტრშეტევის და "რამენაირად ცდილობს ინიციატივის ხელში ჩაგდებას, ყურადღების გადატანას, კატასტროფული ამბების შექმნას".
  • "ჩვენ არ ვუტევთ კრემლს, რადგან, პირველ რიგში, ეს არ წყვეტს სამხედრო პრობლემას. ეს უკიდურესად არახელსაყრელია ჩვენი შეტევითი ზომების მომზადების თვალსაზრისით. ეს რა თქმა უნდა არ ცვლის ვითარებას ფრონტზე. პირიქით, ეს გამოიწვევს რუსეთის კიდევ უფრო რადიკალურ ქმედებებს ჩვენი მშვიდობიანი მოსახლეობის წინააღმდეგ. და რაც მთავარია, ეს საშუალებას მისცემს რუსეთს გაამართლოს მასიური დარტყმები უკრაინის ქალაქებზე, მშვიდობიან მოსახლეობაზე, ინფრასტრუქტურულ ობიექტებზე", — განაცხადა პეზიდენტის მრჩეველმა.

რატომ არის მნიშვნელოვანი: ოკუპანტი ქვეყანა ირწმუნება, რომ ჩამოაგდო ორი უპილოტო თვითმფრინავი, რომლებიც წუხელ მოსკოვში კრემლს დაუმიზნეს.

  • კრემლში განაცხადეს, რომ მომხდარს რუსეთის პრეზიდენტის ვლადიმერ პუტინის სიცოცხლის მოსპობის მცდელობად მიიჩნევენ.
  • მედიაში ჩნდება ვარაუდი, რომ რუსეთის პრეზიდენტის მაღალი დაცვის პირობებში, დაუჯერებელია ფაქტი, რომ უცხო თვითმფრინავი კრემლის ტერიტორიაზე მოხვდა.
  • ბოლო პერიოდში რუსეთში აფეთქებები და ხანძრები გახშირდა.