რატომ არის მნიშვნელოვანი: სუდანში ჯარსა და გასამხედროებულ ძალებს (RSF) შორის შეტაკებებია — დაძაბულობა მას შემდეგ გამწვავდა, რაც მთავრობამ და RSF-მ სამოქალაქო მმართველობაზე გადასვლის შეთანხმებას ვერ მიაღწიეს.

  • დაღუპულია ასეულობით ადამიანი, მათ შორის, მშვიდობიანი მოქალაქეები.
  • სუდანში ამ დრომდე საქართველოს 35-მდე მოქალაქე რჩება, თუმცა კონკრეტულ ციფრს საგარეო სამინისტროში არ ასახელებენ.
  • დაპირისპირებულ ზონაში არიან ქართული ავიაკომპანიების, ჯეო სქაისა და მაი ვეის თანამშრომლები.

დეტალები: საგარეო საქმეთა სამინისტროს განცხადებით, საქართველოს მოქალაქეებმა უკვე დატოვეს უსაფრთხო ადგილი ხართუმში, სადაც გუშინ იყვნენ გადაყვანილები.

  • "მათი ევაკუაციის პროცესი სამშობლოში უკვე დაწყებული არის. იმედი გვაქვს, უახლოეს დღეებში მოხდება მათი საქართველოში დაბრუნება", — ამბობს მინისტრის მოადგილე, ალექსანდრე ხვთისიაშვილი.
  • მისივე განცხადებით, მუდმივ კავშირზე არიან კომპანიებთან და საქართველოს მოქალაქეებთან, რომლებიც სუდანის დედაქალაქში იმყოფებიან.