რატომ არის მნიშვნელოვანი: სამხედრო მობილიზაცია, რომელსაც კრემლი ნაწილობრივს უწოდებდა, შეეხო თითქმის ყველას, გარდა ჩინოვნიკების ოჯახებისა და იმ პირებისა, რომლებიც ქვეყნიდან გამოიქცნენ, მათ შორის საქართველოში.

  • მობილიზაციისთვის თავის არიდება სცადა კრემლის პრესსპიკერის, დმიტრი პესკოვის ვაჟმა ნიკოლაი ჩოულზმაც.

რა მოხდა: 2022 წლის 21 სექტემბერს არხ პოპულარული პოლიტიკის წამყვანმა ჩოულზი დატროლა, სამხედრო კომისარიატის თანამშრომლის სახელით დაურეკა და უთხრა, რომ დილის 10 საათზე კომისარიატში გამოცხადებულიყო.

  • პასუხად, პრესსპიკერის შვილმა თქვა, რომ მისი, როგორც "ბატონი პესკოვის" იქ ყოფნა არასწორი იქნებოდა და დაამატა, რომ ამას "სხვა დონეზე" გადაწყვეტდა.
  • ამტკიცებდა თითქოს, სამშობლოს დაცვის "პრობლემა არ აქვს", თუმცა მისი კომისარიატში მისვლის "მიზანშეწონილობის" გაგება სურდა.
  • კითხვაზე, მზად არის თუ არა მოხალისედ დარეგისტრირდეს, უპასუხა, რომ არა, შედეგ კი თქვა, რომ წასასვლელად მზადაა, თუმცა, არა მათი თხოვნით.
  • "თუ ვლადიმერ ვლადიმეროვიჩი მეტყვის, რომ იქ უნდა წავიდე, წავალ", — ამბობდა ის.
  • ამის შემდეგ დიმიტრი პესკოვმა ფაქტობრივად დაადასტურა, რომ წამყვანი მის შვილს ესაუბრებოდა და თქვა, რომ ჩანაწერიდან ამოჭრილი იყო "შინაარსობრივი ნაწილი".

რა ხდება ახლა: ვაგნერის დამფუძნებელი ევგენი პრიგოჟინი ამტკიცებს, თითქოს პესკოვის შვილი უკრაინაში მის დაჯგუფებაში უბრალო არტილერისტად იბრძოდა.

  • პრიგოჟინის თქმით, პესკოვი 2022 წლის ზაფხულში დაუკავშირდა, მას შემდეგ რაც ნიკოლაიმ ომში წასვლას გადაწყვიტა.
  • "მე ვურჩიე თავდაცვის სამინისტროში არ წასულიყო, რადგან იქ დასვამდნენ შტაბში, ან ხორცად გაუშვებდნენ. ამიტომ, ყალბი საბუთებით, ის წავიყვანე ჩემთან, სახელი, გვარი და მამის სახელი შევცვალე. ამის შესახებ მხოლოდ მე და პერსონალის განყოფილების უფროსმა ვიცოდით", — თქვა პრიგოჟინმა.
  • ამის შემდეგ პროპაგანდისტულმა RT-მ გამოაქვეყნა სამხედრო ფორმაში გამოწყობილი კაცის ფოტო, რომლის სახეც დაფარულია და დაწერა, რომ ეს პესკოვის შვილია.
  • თავად ჩოულზმა კი კომსამოლსკაია პრავდასთან ინტერვიუში პრიგოჟინის ვერსია გაიმეორა — თქვა, რომ მართლა იბრძოდა ვაგნერში, რომელთანაც მამამ დააკავშირა და ისიც დაამატა, რომ სიმამაცისთვის მედალი მიიღო.
  • რაც შეეხება სატელეფონო ინტერვიუს, რომელშიც მობილიზაციაზე უარი თქვა, ამტკიცებს თითქოს იმ მომენტში, როცა დაურეკეს, უკვე სამსახურისთვის ემზადებოდა და "ნერვები ჰქონდა მოშლილი", ამიტომაც თქვა ის, რაც თქვა.