საქართველოს პარლამენტის თავმჯდომარე, ირაკლი კობახიძე ამბობს, რომ კონსტიტუციის პროექტში ქორწინების შესახებ დეფინიცია ჰომოფობიური და დისკრიმინაციული განწყობების გაღვივების თავიდან ასარიდებლად ჩაიწერა. ამის შესახებ კობახიძემ რუსთავი 2-ის ეთერში ისაუბრა.

მისი თქმით, ამ ჩანაწერით ვენეციის კომისიის რეკომენდაცია გათვალისწინებულია, სადაც წერია, რომ კონსტიტუციის ჩანაწერი ოჯახთან დაკავშირებით დისკრიმინაციის საფუძველი არ უნდა გამხდარიყო.

"არიან კონკრეტული ძალები, რომლებსაც აქვთ კონკრეტული კავშირები სხვადასხვა სახელმწიფოსთან და ხელოვნურად ხდება ამ ინსტრუმენტის გამოყენება იმისთვის, რომ გაღვივდეს საქართველოში ჰომოფობიური განწყობები და ანტიდასავლური განწყობები. საქართველოში ჩვენ ამ კუთხით დრამატული პრობლემები არ გვაქვს, ქართული საზოგადოება არის ტოლერანტული და შემწყნარებელი," - აღნიშნა კობახიძემ.

პარლამენტის თავმჯდომარის თქმით, დისკრიმინაციის შემთხვევები საქართველოში არ იქნება წახალისებული.

ამ დრომდე საქართველოს კონსტიტუციაში არ არსებობდა ჩანაწერი, რომელიც ამბობდა, რომ ოჯახი ქალისა და კაცის კავშირი იყო. კონსტიტუციის პროექტით კი, ეს ჩანაწერი ჩნდება.