პუბლიკას ინფორმაციით, თბილისის საქალაქო სასამართლომ, ონლაინგამოცემა პუბლიკას თანადამფუძნებელი და დირექტორი, ზურაბ ვარდიაშვილი სამართალდამრღვევად ცნო და 2 200 ლარით დააჯარიმა.

რატომ არის მნიშვნელოვანი: პუბლიკას დირექტორი, ზურა ვარდიაშვილი 2 მარტს რუსული კანონის საწინააღმდეგო აქციაზე დააკავეს.

  • როგორც პუბლიკა წერს, მის მიმართ შედგენილ სამართალდარღვევის ოქმში წერია, თითქოს "ვარდიაშვილი იგინებოდა ხმამაღლა, იყენებდა უწმაწურ სიტყვებს, არ ემორჩილებოდა პოლიციის არაერთგზის კანონიერ მოთხოვნას, რომ გაეთავისუფლებინა გზა".
  • თუმცა როგორც On.ge-ის ასევე, სხვა მედიების გავრცელებულ კადრებში ჩანს, რომ დაკავებამდე ვარდიაშვილი გზის განაპირას დგას და არავის აგინებს, თბილისის საპატრულო პოლიციის უფროსი, ვაჟა სირაძე კი მისი დაკავების მითითებას მას შემდეგ იძლევა, რაც შეძახილი "მოღალატე" ისმის.
  • ამავე ვიდეოშივე ისმის მოქალაქეების სიტყვები, რომ ვარდიაშვილი ჟურნალისტია, პასუხად, სირაძე ამბობს: "რა ჟურნალისტია, პოლიტიკოსი ხარ", რის შემდეგაც მას აკავებენ.

რა ხდებოდა სასამართლოზე: როგორც პუბლიკა წერს, შსს-ს წარმომადგენლებმა თქვეს, რომ ვარდიაშვილი უშუალოდ პოლიციელმა გიგა მოდებაძემ დააკავა და მისი გამოკითხვა ფაქტობრივი გარემოებების გამოკვლევისთვის საკმარისი იქნებოდა.

  • მათივე ცნობით, გამოკითხულმა გიგა მოდებაძემ სხდომაზე აღნიშნა, რომ ვარდიაშვილი გზის სავალ ნაწილზე დადიოდა და იგინებოდა — ხოლო კითხვაზე, ვისი მისამართით, უპასუხა, რომ კანონის.
  • ამასთან, მოდებაძემ დაადასტურა, რომ ვარდიაშვილი სირაძის მითითებების შემდეგ დააკავა.
  • ადვოკატის მიმართვის მიუხედავად, მოსამართლე ნინო შჩერბაკოვმა ვაჟა სირაძის დაკითხვის შუამდგომლობა არ დააკმაყოფილა.
  • ვარდიაშვილის ადვოკატი 31 მარტს 00:28 საათზე წერდა, რომ პროცესის დაწყებას 15 საათი ელოდებოდნენ და ის რაც სასამართლოებში ხდებოდა ადმინისტრაციული სამართალდარღვევების საქმის განხილვისას არაადამიანური მოპყრობაა.
  • სასამართლო რამდენიმე საათის დაგვიანებით, 05:06 საათზე დასრულდა.