ტელეკომპანია ფორმულას სამმა დამფუძნებელმა, მიშა მშვილდაძემ, ზუკა გუმბარიძემ და გიორგი ლიფონავამ ბრიფინგი მას შემდეგ გამართეს, რაც მათი თანადამფუძნებლის, დავით კეზერაშვილის განცხადება გავრცელდა.

რატომ არის მნიშვნელოვანი: BBC Eye-მ მასშტაბური ჟურნალისტური გამოძიება გამოაქვეყნა, სადაც დავით კეზერაშვილი, თავდაცვის ყოფილ მინისტრი ქოლცენტრების თაღლითურ სქემებთან კავშირში ამხილა.

• სქემის მიხედვით, ქოლ-ცენტრების თანამშრომლებს წვდომა ჰქონდათ მონაცემთა ბაზაზე, ურეკავდნენ ადამიანებს, ადგენდნენ მათ ფინანსურ მდგომარეობას და სხვადასხვა სარგებელს სთავაზობდნენ, ნდობაში შესვლის შემდეგ კი ამ ადამიანების დანაზოგებს ითვისებდნენ.
• გამოძიებისას გამოააშკარავეს 152 ბრენდი, მათ შორის Milton Group, რომლებიც, როგორც ჩანს, თაღლითური ქსელის ნაწილია.
• BBC Eye-ს ვარაუდით, ამ კომპანიების უკან დგას დავით კეზერაშვილიც, მაგრამ არ არსებობს საჯაროდ ხელმისაწვდომი დოკუმენტები, რომლებიც კეზერაშვილს ქსელთან დააკავშირებს — თუმცა, მისი სახელი ფიგურირებს პანამას დოკუმენტებში, როგორც თაღლითურ ქსელთან დაკავშირებული კომპანიის ერთ-ერთი დამაარსებლის ან მეწილის.
• კეზერაშვილმა ბრალდებები თავიდანვე უარყო და განაცხადა, რომ BBC-თან კითხვები აქვს და სამართლებრივ ბერკეტებს გამოიყენებს.

კეზერაშვილის განცხადება: ყოფილი მინისტრის მტკიცებით, მის ირგვლივ შექმნილი მძიმე გარემოს მიუხედავად, პროცესებიდან გასვლას არ განიხილავს. თუმცა იღებს გადაწყვეტილებას მისი დახმარების პარალელურად ტელეკომპანია ფორმულას მისცეს ახალი მედია-მოდელის შექმნის შესაძლებლობა.

• "გადაწყვეტილება ასეთია: მე უარს ვამბობ "ფორმულას" საკონტროლო პაკეტზე და არსებული წილის ნახევარს ახლავე გადავცემ ტელეკომპანიის კოლექტივს. მას შემდეგ კი, რაც დასრულდება ოლიგარქიული მმართველობა, ფორმულას კოლექტივსვე სრულად გადავცემ ჩემს დარჩენილი წილსაც", — ვკითხულობთ კეზერაშვილის წერილში.
• მისივე თქმით, დარწმუნებულია, რომ ივანიშვილის ფაქტორის გაქრობისა და დასავლურ სივრცეში საბოლოოდ შესვლის შემდეგ, თავისუფალ მედიას მისი მონაწილეობის გარეშეც გაუჩნდება სხვა საარსებო წყარო და პოლიტიკიდან წასვლის პირობასაც დებს.
• "აქ დაესმება წერტილი ჩემს აქტივობას მედიის მხარდაჭერის მიმართულებით და ზოგადად, ყველა ტიპის ჩართულობას ქართული პოლიტიკაში", — წერს ის.

დამფუძნებლების განცხადება: კიდევ ერთხელ განმარტეს, რომ დავით კეზერაშვილი საკონტროლო პაკეტის ნაწილს, ნახევარს გადასცემს ფორმულას კოლექტივს.

• გენერალური დირექტორის განცხადებით, 25% გადაეცემა ჟურნალისტებს, რომლებსაც საზოგადოება კარგად იცნობს ეკრანებიდან და მათაც, ვინც კადრს მიღმა დგას, მაგრამ დიდ როლს თამაშობს ტელევიზიის მაუწყებლობაში.
• მისივე თქმით, ამ ეტაპზე ზუსტი სია არ აქვთ, რადგან გადაწყვეტილება უპრეცენდენტოა, თუმცა ინკლუზიური პროცესის პირობას დებენ.
• "მიუხედავად იმისა, რომ აქ დასაქმებულმა ყველა ადამიანმა იცის, რომ ფორმულას სარედაქციო პოლიტიკას განვსაზღვრავდი მე, როგორც გენერალური დირექტორი, მენეჯმენტი, ვისაც ეს პირდაპირ ევალებოდა და ასევე, ყველა ის ჟურნალისტი, რომელიც აქ მუშაობს, ამის გარდა ჩვენ გვინდა, რომ დამატებითი იურიდიული ჩარჩოც იყოს შექმნილი, რომ ამ გადაწყვეტილების მერ გამორიცხული იყოს რომელიმე ერთი დამფუძნებლის მხრიდან კომპანიაში საკონტროლო წილის ფლობა ან ერთპიროვნულად სარედაქციო პოლიტიკაში ჩარევის შესაძლებლობაც კი", — განაცხადა ზუკა გუმბარიძემ.
• როგორც მან განმარტა, ამ პაკეტის მფლობელი პირები შექმნიან ორგანიზაციას, სადაც აირჩევენ თავმჯდომარეს, რომელიც იქნება წარდგენილი ფორმულას მმართველ ორგანოში და ფორმულელების პოზიცია ყველა დონეზე გაჟღერდება.
• გუმბარიძემ თქვა ისიც, რომ ამის მიუხედავად დავით კეზერაშვილი გააგრძელებს ფორმულას ფინანსურ დახმარებას.
• "იმ დეფიციტს, რომელიც არსებობს შემოსავლებსა და ხარჯებს შორის, ის კვლავ გააგრძელებს ამ ხარჯების შევსებას ტელეკომპანიისთვის", — განაცხადა მან და აღნიშნა, რომ უფრო მეტ დეტალზე დღევანდელ გადაცემაში ისაუბრებენ.

გაიგეთ მეტი BBC-ის გამოძიებაზე:

• ბიზნესმენი მილიარდდოლარიანი თაღლითობის უკან — BBC-ის სტატია კეზერაშვილზე ქართულად
• BBC ქოლცენტრების თემაზე 47-წუთიან გამოძიებას აქვეყნებს — რა გავიგეთ ახალი