რა ხდება: რუსეთის, ვნუკოვოს აეროპორტის ვებგვერდზე საქართველოს მიმართულებით პირდაპირი რეისი გამოჩნდა, მოგვიანებით კი წაიშალა.

• საიტზე მითითებული ინფორმაციით, რომელიც მოგვიანებით წაიშალა, ცნობილი ხდებოდა, რომ პირდაპირი ფრენები 18 აპრილს განახლდებოდა.
• ეწერა ისიც, რომ რეისებს თბილისის მიმართულებით Georgian Airways შეასრულებდა. თუმცა ავიაკომპანიის ვებგვერდზე მსგავსი ინფორმაცია არ იყო განთავსებული.
• BM.GE-სთან Georgian Airways-ის დამფუძნებელმა თამაზ გაიაშვილმა თქვა, რომ ავიამიმოსვლა 18 აპრილიდან არ აღდგება — "ინფორმაცია არასწორია. არანაირი სააღდგომო რეისი არ დანიშნულა. არ ვგეგმავთ 18 აპრილიდან რეისებს. მომავალში რა იქნება ვნახოთ, ჩემთვის ფრენა არავის აუკრძალავს".
• ქვემოდ მოცემულია სხვადასხვა დროს გადაღებული სქრინები: 1.სადაც თბილისისკენ პირდაპირი რეისი იძებნებოდა; 2. რეისი აღარ იძებნება.

საქართველოს სამოქალაქო ავიაციის სააგენტოს განცხადებით, საქართველოსა და რუსეთს შორის პირდაპირი რეგულარული საავიაციო მიმოსვლა არ ხორციელდება და აღნიშნული ვითარების სტატუს-კვო არ შეცვლილა.

• "ასევე გვსურს აღვნიშნოთ, რომ რუსულ მხარეს არ მოუმართავს რეგულარული საჰაერო მიმოსვლის აღდგენის თაობაზე";
• "შესაბამისად, მედიაში გავრცელებული ინფორმაცია, ქართული ავიაკომპანიის მიერ მოსკოვის მიმართულებით პირდაპირი ავიარეისების შესრულების თაობაზე, არ შეესაბამება სიმართლეს";
• "სავარაუდოდ, ქართული კომპანიის ინიციატივასთან დაკავშირებით კომენტარს ვერ გავაკეთებთ".

რატომ არის მნიშვნელოვანი: 2019 წლის 20 ივნისს სერგეი ლავროვის პარლამენტში გამოსვლისა და მასშტაბური ანტისაოკუპაციო აქციის დაშლის შემდეგ, პუტინის განკარგულებით, რუსულ ავიაკომპანიებს საქართველოში პირდაპირი საჰაერო რეისების განხორციელება ეკრძალებათ. ფრენები შეჩერებულია ქართული ავიაკომპანიებისთვისაც.

• 2022 წლის 18 იანვარს ოკუპანტი ქვეყნის საგარეო საქმეთა მინისტრმა საქართველოსთან პირდაპირი ავიამიმოსვლის აღდგენის იმედი გამოთქვა.
• 19 იანვარს ირაკლი კობახიძემ განაცხადა, რომ თუ რუსეთთან ფრენები აღდგება, ეს მისასალმებელი იქნება, ამაში "ცუდი ვერაფერი დაინახა" კახა კალაძემაც.
• 20 იანვარს კომუნისტმა სერგეი გავრილოვმა თქვა, რომ ფრენებთან ერთად საქართველო-რუსეთის დიპლომატიური ურთიერთობების სრულად აღდგენაც უნდა.
• ამავე წლის 25 იანვარს უკრაინის საგარეომ განაცხადა, რომ ქართულმა მხარემ დაარწმუნა, რუსეთთან ფრენების განახლებას არ აპირებენ.
• აშშ-ის სახელმწიფო დეპარტამენტში ამბობენ, რომ თუ რუსეთთან ფრენების აღდგება, შესაძლოა, კომპანიები დასანქცირდნენ.
• 2023 წლის თებერვალში რუსეთის ფედერაციის საბჭოს საერთაშორისო საქმეთა კომიტეტის თავმჯდომარის პირველი მოადგილე ამტკიცებდა, რომ საქართველომ ფრენების აღდგენა თავად შესთავაზა.
• 22 მარტს რუსულმა სამთავრობო, პროპაგადნისტულმა მედია TASS-მა დაწერა, რუსმა დეპუტატმა ეკონომიკურ ფორუმზე თქვა,რომ საქართველოსთან ავიამიმოსვლის აღდგენისა და ვიზების გაუქმების "ზღვარზე არიან".

ქართულ ოცნებაში აქამდე არაერთხელ უთქვამთ, რომ რუსეთთან პირდაპირ ფრენებს მიესალმებიან.

• მათ შორის იყო თბილისის მერი კახა კალაძე, პარტიის თავმჯდომარე ირაკლი კობახიძე.