დეპუტატის განცხადებას რუსული სახელმწიფო მედია TASS ავრცელებს.

რატომ არის მნიშვნელოვანი: 2019 წლის 20 ივნისს სერგეი ლავროვის პარლამენტში გამოსვლისა და მასშტაბური ანტისაოკუპაციო აქციის დაშლის შემდეგ, პუტინის განკარგულებით, რუსულ ავიაკომპანიებს საქართველოში პირდაპირი საჰაერო რეისების განხორციელება ეკრძალებათ. ფრენები შეჩერებულია ქართული ავიაკომპანიებისთვისაც.

• 2022 წლის 18 იანვარს ოკუპანტი ქვეყნის საგარეო საქმეთა მინისტრმა საქართველოსთან პირდაპირი ავიამიმოსვლის აღდგენის იმედი გამოთქვა.
• 19 იანვარს ირაკლი კობახიძემ განაცხადა, რომ თუ რუსეთთან ფრენები აღდგება, ეს მისასალმებელი იქნება, ამაში "ცუდი ვერაფერი დაინახა" კახა კალაძემაც.
• 20 იანვარს კომუნისტმა სერგეი გავრილოვმა თქვა, რომ ფრენებთან ერთად საქართველო-რუსეთის დიპლომატიური ურთიერთობების სრულად აღდგენაც უნდა.
• ამავე წლის 25 იანვარს უკრაინის საგარეომ განაცხადა, რომ ქართულმა მხარემ დაარწმუნა, რუსეთთან ფრენების განახლებას არ აპირებენ.
• აშშ-ის სახელმწიფო დეპარტამენტში ამბობენ, რომ თუ რუსეთთან ფრენების აღდგება, შესაძლოა, კომპანიები დასანქცირდნენ.
• 2023 წლის თებერვალში რუსეთის ფედერაციის საბჭოს საერთაშორისო საქმეთა კომიტეტის თავმჯდომარის პირველი მოადგილე ამტკიცებდა, რომ საქართველომ ფრენების აღდგენა თავად შესთავაზათ.

დეტალები: TASS-ის ინფორმაციით, გაიმართა ეკონომიკური ფორუმი "რუსეთსა და საქართველოს შორის ეკონომიკური ურთიერთობების განვითარების პერსპექტივები", სადაც დუმის დსთ-ს, ევრაზიის ინტეგრაციისა და თანამემამულეებთან ურთიერთობის კომიტეტის ხელმძღვანელმა ლეონიდ კალაშნიკოვმა თქვა, რომ რუსეთი და საქართველო პირდაპირი ფრენების აღდგენის, რუსეთში ვიზების გაუქმების ზღვარზე არიან.

• "მე ვესაუბრე [...] უმაღლესი დონის ბევრ ოფიციალურ პირს, მათ შორის იმ საკითხებზე, რომლებსაც ჩვენ ყველა შევეხეთ. ძალიან მგრძნობიარე საკითხები, რომლებიც ჩვენ უნდა გადავწყვიტოთ — საჰაერო მიმოსვლა და ვიზების გაუქმება რუსეთში. უნდა ვთქვა, რომ ჩვენ ვართ ამ გადაწყვეტილებების ზღვარზეა", — განაცხადა კალაშნიკოვმა.
• მანვე აღნიშნა, რომ მისთვის რთულია შეფასება, როდის და რა თანმიმდევრობით იქნება ეს გადაწყვეტილებები.
• გარდა ამისა, TASS-ის ინფორმაციით, რუსეთის ეკონომიკური განვითარების მინისტრის მოადგილემ დიმიტრი ვოლვაჩმა ხაზი გაუსვა, რომ რუსეთი საქართველოს მთავარი სავაჭრო პარტნიორი გახდა 2022 წელს.
• "წინა წლებთან შედარებით ჩვენ ვხედავთ ძალიან სერიოზულ ეკონომიკურ დაახლოებას, რამაც შეიძლება ჩვენთვის შექმნას საფუძველი უფრო ფართო ეკონომიკური თანამშრომლობისთვის. აქ უკვე საკმაოდ მოსალოდნელი სწორი ნაბიჯები იდგმება", — განაცხადა სანქცირებული და იზოლაციაში მოქცეული ქვეყნის მინისტრის მოადგილემ საქართველოზე.
• ფრენებზე ინფორმაციის გადასამოწმებლად და დამატებითი დეტალებისთვის ეკონომიკის სამინისტროს მივმართეთ, სადაც კითხვის ელექტრონული ფოსტით გაგზავნა მოითხოვეს.
• ვცდილობთ დაკავშირებას რუსეთთან ურთიერთობის საკითხებში პრემიერმინისტრის სპეციალურ წარმომადგენელთან, ზურაბ აბაშიძესთანაც.
• მათ პასუხს ველოდებით და მიღებისთანავე მასალა განახლდება.