რატომ არის მნიშვნელოვანი: 6 თებერვალს პარლამენტის თავმჯდომარის ბრძანებით, მედიას ახალი შეზღუდვები დაუწესდა.

  • ჟურნალისტებსა და ოპერატორებს კონკრეტული ქცევის წესების დაცვა ევალებათ.
  • სწორედ მათ დარღვევას ედავება პარლამენტი TV პირველის ჟურნალისტს, რუსუდან დუმბაძესა და ოპერატორ ირაკლი მურმანიშვილს, მთავარი არხის ჟურნალისტს, თათია წოწონავასა და ოპერატორ ზუკა ჩხვირკიას, ასევე — ფორმულას ჟურნალისტს, სოფიო გოზალაშვილს — მათ აკრედიტაცია შეუჩერდათ.
  • გადაწყვეტილება უკავშირდება აშშ-ის მიერ სანქცირებულ მოსამართლეებსა და პროსამთავრობო მედია POST TV-ის ერთ-ერთ დამფუძნებელზე, სექსუალურ შევიწროებაში მხილებულ შალვა რამიშვილზე მომზადებულ სიუჟეტებს.

დეტალები: ხატია დეკანოძის განცხადებით, უმრავლესობის წარმომადგენლები და დეპუტატები არიან საჯარო ფიგურები, შესაბამისად, აქვთ ვალდებულება მოქალაქეების წინაშე.

  • "ისინი წარმოადგენენ მოქალაქეების მანდატს, რომ პასუხი გასცენ ყველა იმ შეკითხვას, რომელიც აინტერესებს საზოგადოებას", — თქვა მან.
  • ანა ნაცვლიშვილმა სოლიდარობა გამოუცხადა აკრედიტაციაშეჩერებულ ჟურნალისტებს, რომლებიც, მისი თქმით, პარლამენტის თავმდჯომარის მხრიდან, პროფესიული მოვალების შესრულების გამო დასჯის ობიექტები გახდნენ.
  • ასევე, პაპუაშვილის მიერ შემოღებულ წესს მედიის, გამოხატვის, ინფორმაციის თავისუფლების საწინააღმდეგო უწოდა და ხაზი გაუსვა, რომ პარლამენტის თავმჯდომარემ ის ერთპიროვნულად, საპარლამენტო ფრაქციებთან კონსულტაციის გარეშე მიიღო.
  • მისივე თქმით, ეს წესი მხოლოდ ერთი პარტიის ინტერესებსაა მორგებული.

პაპუაშვილმა ჟურნალისტებს "წესების წაკითხვისკენ" მოუწოდა და ამტკიცებს, რომ აკრედიტაციის შეჩერების მიზეზი კითხვების შინაარსი არაა.

  • "მოგიწოდებთ, გამოყავით 2 წუთი, აიღეთ ეს წესები და წაიკითხეთ. უბრალოდ წაიკითხეთ, ცოტა შრომა გაწიეთ, რომ წაიკითხოთ წესები".