ამის შესახებ უწყებამ ოფიციალური განცხადება გაავრცელა.

რატომ არის მნიშვნელოვანი: რუსული კანონის საწინააღმდეგო აქციის მონაწილე, 21 წლის აქტივისტი პოლიციამ 29 მარტს დააკავა, 31 მარტს კი სასამართლომ აღკვეთის ღონისძიების სახით პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • 3 მარტს, დაკავებულის მონახულების შემდეგ ადვოკატმა, ლიკა ბითაძემ თქვა, რომ მისი დაცვის ქვეშ მყოფს აღიარებითი ჩვენება მეგობრის დაკავების მუქარით, უფლებადამცველთან გასაუბრების გარეშე მიაცემინეს.
  • გარდა ამისა, ბითაძემ ამბობს, რომ გრიგორიადისს ციხეში, მისი ნების საწინააღმდეგოდ, თმა გადაპარსეს.

დეტალები: პენიტენციური ამბობს, რომ ბრალდებულმა პატიმრობის კოდექსის 36-ე მუხლით გათვალისწინებული "საპარიკმახერო მომსახურების უფლებით ისარგებლა".

  • "სიმართლეს არ შეესაბამება ინფორმაცია, თითქოს მას თმა მთლიანად გადაპარსეს, მით უმეტეს, მისი ნების საწინააღმდეგოდ", — ნათქვამია განცხადებაში.
  • უწყება უარყოფს იმასაც, რომ დაკავებულთან ადვოკატი არ შეუშვეს, თუმცა არაფერს ამბობს ბითაძის განცხადებაზე, რომ გრიგორიადისს ადვოკატთან არ დაარეკინეს.
  • აქტივისტი 29 მარტს დააკავეს, თუმცა პენიტენციურს არგუმენტად 31 მარტს ომბუდსმენის წარმომადგენლის მხრიდან მისი მონახულება მოჰყავს.
  • "ბრალდებულის დაცვის უფლება, ისევე როგორც ნებისმიერი პატიმრის, სრულად გარანტირებულია პენიტენციურ დაწესებულებებში. დაწესებულებაში მოთავსების დღესვე, 2023 წლის 31 მარტს, 21:50 საათზე, მოინახულა სახალხო დამცველის აპარატის წარმომადგენელმა".