ინფორმაციას ამის შესახებ აქტივისტი სალომე ბარკერი ავრცელებს.

რატომ არის მნიშვნელოვანი: რუსული კანონის საწინააღმდეგო აქციის მონაწილე, ლაზარე გრიგორიადისი პოლიციამ 29 მარტს დააკავა, გუშინ, 31 მარტს კი სასამართლომ პატიმრობა შეუფარდა.

  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • 21 წლის აქტივისტის დაკავების შემდეგ მის წინააღმდეგ ქართულმა ოცნებამ მადესკრედიტირებელი და პროპაგანდისტული კამპანია წამოიწყო.
  • მმართველი გუნდის თავმჯდომარემ 21 წლის აქტივისტს "გზას აცდენილი კაცი" უწოდა და თქვა, რომ "ჩანს, ყველანაირი ორიენტაცია არეული აქვს" — კობახიძის ამ განცხადებას, სავარაუდოდ, ჰომოფობიური ქვეტექსტი ჰქონდა.

დეტალები: დღეს სალომე ბარკერმა დაწერა, რომ ესაუბრა დაკავებული აქტივისტის ოჯახის წევრებს, რომლებსაც ადვოკატის აყვანისთვის საჭირო ფულის შეგროვება შესთავაზა.

  • მოგვიანებით, ბარკერმა გაავრცელა ინფორმაცია, რომ ადვოკატისა და სხვა ხარჯებისთვის ოთხ საათში სრული თანხა — 19 175 ლარი შეგროვდა.
  • "რა თქმა უნდა, მთლიანად ვურიცხავ ლაზარეს ბაბუას. ადვოკატის ხარჯების გარდა, რაშიც ლაზარეს დასჭირდება იმაში მოიხმარს. მთელი ოჯახი შოკშია, უდიდეს მადლობას გითვლიან ყველას, რომ არ დატოვეთ მარტო ეს ბიჭი", — დაწერა მან.