რესპუბლიკური პარტიის ყოფილი სახე ვახტანგ ხმალაძე დავით უსუფაშვილის მიერ დღეს დაარსებულ მოძრაობაში გამოჩნდა. როგორც ხმალაძემ On.ge-ს უთხრა, შენების მოძრაობამ პარტიად ჩამოყალიბებამდე გზა უნდა გაიაროს.

ხმალაძე On.ge-სთან საუბრისას ამბობს, რომ ახალ საინიციატივო ჯგუფში ადამიანები მასთან ახლოს მდგომი ღირებულების გარშემო არიან გაერთიანებულნი და სწორედ ამიტომ დგას ის მათ გვერდით. იგი დასძენს, რომ მოძრაობაში შესული ადამიანების ნაწილი პოლიტიკურ ცხოვრებას ახლა იწყებს.

ხმალაძის თქმით, ახალი მოძრაობა ითანამშრომლებს ყველასთან, ვინც მათთან ურთიერთობას მტრობით არ შეხვდება:

"თანამშრომლობას მხოლოდ მათთან ვაპირებთ, ვინც ჩვენს პრინციპებს აღიარებს. სხვანაირად აზრი არ ექნება. ვინც მზადაა იმისთვის, რომ კონფრონტაციის ნაცვლად გადავიდეს თანამშრომლობის რეჟიმზე, ბუნებრივია ჩვენც მზად ვიქნებით თანამშრომლობისთვის".

ხმალაძე ამბობს, რომ სახელმწიფოსთვის უმთავრესი საკითხები შიდა დიალოგით უნდა წყდებოდეს:

"ურთიერთობები უნდა იყოს დაფუძნებული კონკურენციაზე, კრიტიკაზე და არა მტრობაზე. ყველა ადამიანში არის კარგი და არის ცუდიც, უნდა შევეცადოთ ვიპოვოთ კარგი და შევძლოთ, მისი გამოყენება. უნდა ვეცადოთ, რომ სახელმწიფოსთვის უმთავრესი საკითხები წყდებოდეს ანალიზისა და ურთიერთშეთანხმების საფუძველზე. ერთხელ და სამუდამოდ, უარი უნდა ვთქვათ იმაზე, რომ შენ თუ ასე თქვი, მე აუცილებლად საწინააღმდეგო უნდა ვთქვა და პირიქით".

ხმალაძე მიიჩნევს, რომ ახალი პარტიის შექმნა დღევანდელ რეალობაში "სასიცოცხლოდ მნიშვნელოვანი" იყო.