დღეს, 2 მარტს საკანონმდებლო ორგანოში “მაუწყებლობის შესახებ საქართველოს კანონში" ცვლილებების შეტანაზე იმსჯელებენ. კანონპროექტის ინიციატორი აჭარის ავტონომიური რესპუბლიკის უმაღლესი საბჭოა და ის მიზნად საზოგადოებრივი მაუწყებლის აჭარის ტელევიზიისა და რადიოს თანამშრომლებისთვის ხელფასების 25%-იან ზრდას ითვალისწინებს.

კანონპროექტის განმარტებით ბარათში წერია, რომ მისი ინიცირება ციფრულ მაუწყებლობაზე გადასვლის შემდეგ საზოგადოებრივი მაუწყებლის აჭარის ტელევიზიისა და რადიოს ხარჯების გაზრდამ გამოიწვია. კანონპროექტით წარმოდგენილი ცვლილების პაკეტი აჭარის საზოგადოებრივი მაუწყებლის ციფრულ მაუწყებელზე სრულად გადასვლას, პროგრამული პრიორიტეტების განხორციელებასა და თანამშრომლებისთვის ხელფასების 25%-ით გაზრდას ისახავს მიზნად.

წარმოდგენილი ინიციატივა ბიუჯეტიდან თანხების გამოყოფას არ მოითხოვს. დღეს მოქმედი კანონმდებლობით, აჭარის საზოგადოებრივი მაუწყებელი საზოგადოებრივი მაუწყებლის ბიუჯეტიდან არანაკლებ 15%-ით ფინანსდება. წარმოდგენილი ინიციატივა კი ამ თანხის 17%-მდე გაზრდას გულისხმობს. კანონპროექტის მიღების შემთხვევაში ცვლილება ძალაში 2017 წლის 1 იანვრიდან შევა.

2015 წლის 25 დეკემბრის საზოგადოებრივი მაუწყებლის სამეურვეო საბჭოს გადაწყვეტილებით, მაუწყებლის მთლიანი ბიუჯეტი დაახლოებით 43 მილიონ ლარია, საიდანაც აჭარის საზოგადოებრივი მაუწყებლის დაფინანსებაზე 6 მილიონ 765 ლარია გამოყოფილი, რაც მთლიანი ბიუჯეტის დაახლოებით 15%-ია.