ვიდეო, რომელშიც ირანელი ქალები ჰიჯაბის გარეშე ცეკვავენ, ინტერნეტში ვირუსულად გავრცელდა. ქალებმა ვიდეოს გადაღება და გავრცელება მას შემდეგ გადაწყვიტეს, რაც ცეკვისთვის ირანის უსაფრთხოების ძალებმა თინეიჯერები დააკავეს და აიძულეს, მომხდარის გამო ვიდეოთი ბოდიში მოეხადათ. შეგახსენებთ, რომ კანონების მიხედვით, ირანში ქალებს ჰიჯაბის გარეშე საჯარო ადგილებში ყოფნა და ცეკვა ეკრძალებათ.

ვიდეო, რომელშიც 5 ირანელი თინეიჯერი ცეკვავს, ტიკტოკზე ვირუსულად გავრცელდა. გოგოები Rema-სა და სელენა გომესის ცნობილ სიმღერა Calm Down-ზე ცეკვავენ, რაც ინტერნეტში მაშინვე ირანში არსებული მკაცრი რეჟიმის წინააღმდეგ პროტესტის სიმბოლოდ იქცა.

თინეიჯერების ჯგუფი მალევე დააკავეს და ცოტა ხანში ვიდეო გავრცელდა, რომელშიც ირანელი გოგოები ცეკვისთვის ბოდიშს იხდიან. ბოდიშის ვიდეოში ირანელ გოგოებს ჰიჯაბიც უკეთიათ და გრძელი ტანსაცმელიც აცვიათ.

ამაზე პასუხად, ირანში საპროტესტო ტალღა ისევ გაძლიერდა. ქალებმა მსოფლიოდან და ირანიდან იგივე მუსიკაზე ცეკვის არაერთი ვიდეო გადაიღეს, რომლებიც ინტერნეტში ისევ პოპულარული გახდა.

@xcameliax5 #freeiran #iranrevolution #iranprotests2022 #dance4iran #womanlifefreedom #fyp #fy #london #foryou#rema #calmdown @Rema @Speaker Box Street Party ♬ Calm Down - Rema

შეგახსენებთ, რომ 22 წლის ირანელი ქალის, მაჰსა ამინის გარდაცვალებას ქვეყანაში, შემდეგ კი მსოფლიოში საპროტესტო აქციები მოჰყვა. მაჰსა ამინი ე.წ. მორალის პოლიციამ "ჰიჯაბის ტარების წესის დარღვევისთვის" 13 სექტემბერს დააპატიმრა. თვითმხილველების თქმით, პოლიციის მანქანაში ჩასმის შემდეგ მაჰსას ფიზიკურად გაუსწორდნენ, მოგვიანებით კი ქალი გარდაიცვალა.

სწორედ ამ ფაქტის შემდეგ ირანში საპროტესტო აქციები დაიწყო. აქციაზე ირანელმა ქალებმა ჰიჯაბები დაწვეს და 22 წლის ქალის გარდაცვალება ამ ფორმითაც გააპროტესტეს. პროტესტიდან ცოტა ხნის შემდეგ კი, ირანის გენერალური პროკურორის, მოჰამად ჯაფარ მონტაზერის განცხადებით, ქვეყანაში მორალის პოლიციის საქმიანობა შეჩერდა. მორალის პოლიციას ქვეყანაში სამოსის ისლამური წესით ტარების კონტროლი ევალებოდა. აღსანიშნავია, რომ ირანში ჰიჯაბის ტარება ყველა ქალისთვის სავალდებულო 1983 წლის აპრილში გახდა.