კმაყოფილი მომხმარებელი ბიზნესის წარმატების გასაღებია. ამიტომ, მომხმარებელი ის მთავარი ღირებულებაა, რომელზეც მცირე, საშუალო თუ დიდი ბიზნესი გამუდმებით უნდა ფიქრობდეს და კეთილგანწყობის მოსაპოვებლად ძალისხმევას არ იშურებდეს.

თიბისის ბიზნესდაჯილდოება მრავალი წელია ქართული ბიზნესის განვითარებაზე ზრუნავს და საუკეთესო მაგალითების ჩვენებით დამწყებ კომპანიებს წინსვლის საუკეთესო შესაძლებლობებს უზიარებს. იქიდან გამომდინარე, რომ ერთგული მომხმარებლის გარეშე ზრდა და კონკურენტულ გარემოში თავის დამკვიდრება, ფაქტობრივად, წარმოუდგენელია. გასულ წელს დაჯილდოებას ახალი ნომინაცია დაემატა, რომელიც გამორჩეული სამომხმარებლო გამოცდილებისთვის საუკეთესოებს გამოავლენს.

თიბისის ბიზნესდაჯილდოებას წელს კიდევ ერთი სიახლე დაემატა — თიბისის ინიციატივით და Visa-სთან პარტნიორობით, პანელური დისკუსიების სერია დაიწყო, რომლის ფარგლებში, 5 თვის განმავლობაში 5 შეხვედრა გაიმართება და სხვადასხვა ნომინაციის გამარჯვებულები, ფინალისტები, ჟიურის წევრები და სხვადასხვა მიმართულების ექსპერტები აუდიტორიას წარმატებულ მაგალითებზე მოუყვებიან, განვითარების შესაძლებლობებზე მოსაზრებებს გაუზიარებენ და დამსწრეებისთვის საინტერესო შეკითხვებს პასუხს გასცემენ.

პანელური დისკუსიების პირველი შეხვედრა, რომელიც 16 მარტს გაიმართა, სწორედ გამორჩეულ სამომხმარებლო გამოცდილებას შეეხებოდა. ღონისძიების სპიკერები თიბისის მომხმარებლის გამოცდილების მართვის ლიდერი, დავით ჯაფარიძე, 2022 წლის ბიზნესდაჯილდოების გამარჯვებული კომპანია VELI.store-ის აღმასრულებელი დირექტორი, არჩილ ფირიაშვილი, მარკეტერის დამფუძნებელი და სილქროუდ ჯგუფის მარკეტინგის დირექტორი, აკო ახალაია და ოკტოპუს ფიტნეს კლუბის დირექტორი, გიორგი ასათიანი იყვნენ.

დავით ჯაფარიძე; არჩილ ფირიაშვილი; აკო ახალაია

ფოტო: თიბისი ბიზნესისთვის

დავით ჯაფარიძის თქმით, თიბისის პანელური დისკუსია საინტერესო შეიძლება იყოს ნებისმიერი ბიზნესისთვის, რომელიც მომხმარებლის გამოცდილების გაუმჯობესებაზე ზრუნავს.

"თიბისისთვის ბიზნესდაჯილდოება და აქედან წამოსული ღონისძიებები ერთ-ერთი მნიშვნელოვანი გზა და საშუალებაა, რომ მცირე და საშუალო ბიზნესებს განვითარებაში დავეხმაროთ. როგორც უკუკავშირი აჩვენებს, ამ პროცესში მონაწილეობა ბიზნესებისთვისაც საინტერესოა. ჩვენი მიზანია, რომ სხვადასხვა კომპანიის მაგალითების და მოსაზრებების გაზიარებით, ბიზნესი დაფიქრდეს, რა შეუძლია უკეთ გააკეთოს. თუ დამსწრეები პანელური დისკუსიიდან ერთ რჩევას მაინც წაიღებენ, რომელიც მომხმარებლისთვის უკეთესი გამოცდილების შექმნაში დაეხმარებათ, ჩავთვლით, რომ ღონისძიება შედგა", — აღნიშნავს დავით ჯაფარიძე.

თიბისის მომხმარებლის გამოცდილების მართვის ლიდერი ამბობს, რომ მომხმარებლის კმაყოფილება, ერთგულება არის ის, რაც ბიზნესს ასაზრდოებს და ამ მიმართულებით გაწეული ძალისხმევა ბიზნესს უკან უბრუნდება, მათ შორის, შემოსავლების სახით.

არჩილ ფირიაშვილი კი აღნიშნავს, რომ მომხმარებლის გამოცდილების შესახებ ცნობიერების აწევა ქართული ბიზნესისთვის ძალიან ღირებულია, რადგან განვითარებას უწყობს ხელს და VELI.store-ის წარმატებასაც სწორედ ეს განაპირობებს.

"მეტი უნდა ვისაუბროთ, ვიმსჯელოთ და გავაუმჯობესოთ მომხმარებლის გამოცდილება, ეს ნებისმიერი ბიზნესისთვის უმნიშვნელოვანესია. აღნიშნული ფორმატი სწორედ ამიტომ არის მნიშვნელოვანი. ვსაუბრობთ არა სხვა ქვეყნის გამოცდილებაზე, არამედ ქართულ, პრაქტიკულ, რეალურ მაგალითებზე, კომპანიებზე, რომლებიც დღეს ოპერირებენ და შეგვიძლია რეალურ მოქმედებაში დავინახოთ ის ეფექტი, რაც შეიძლება მოიტანოს ამ ყველაფერმა. მაგალითად, VELI.store-ში მომხმარებლის გარშემო ვქმნით მთელ ტექნოლოგიებს, ინფრასტრუქტურას თუ პროდუქტებს, ჩვენთვის ეს არის სტრატეგიული მნიშვნელობის მიმართულება", — გვეუბნება არჩილ ფირიაშვილი.

აკო ახალაია აღნიშნავს, რომ თიბისის ბიზნესდაჯილდოების როლი ქართული ბიზნესის განვითარებაში მნიშვნელოვანია, დისკუსიების ფორმატი კი საშუალებას იძლევა, რომ ბიზნესგარემოს გაუმჯობესებისთვის უმნიშვნელოვანესი ფაქტორი, ინფორმაციის მიმოცვლა გამარტივდეს

"ვფიქრობ, დისკუსიის ფორმატი ეფექტურია, რადგან დამსწრე აუდიტორია ხედავს ადამიანებს, რომლებიც საუბრობენ და და შეიძლება აღმოაჩინოს პროფესიონალი, რომლის რჩევაც გამოადგება. ან, სულაც, მოსმენილი ინფორმაცია მიახვედრებს, რომ უკეთესი გზაც არსებობს. შეხვედრები, აზრთა მიმოცვლა ადამიანს სჭირდება, რათა გაიგოს, სად რა ხდება", — ამბობს აკო ახალაია.

გიორგი ასათიანის თქმით, ლოგიკურია, რომ პირველი პანელური დისკუსია მომხმარებლის გამოცდილებას შეეხება, რადგან პირველი ნაბიჯები, რაზეც ბიზნესი უნდა ფიქრობდეს, სწორედ მომხმარებლის კმაყოფილებაზე ორიენტირებაა.

"მომხმარებელი არის ის ცენტრალური ნაწილი, რის გარშემოც უნდა იტრიალოს ყველაფერმა, იქნება ეს ბიზნეს გადაწყვეტილებები, თანამშრომლები, მომწოდებლები თუ ასე შემდეგ. ბიზნესი მუდმივად უნდა ფიქრობდეს, ესა თუ ის გადაწყვეტილება რა გავლენას მოახდენს მომხმარებლის გამოცდილებაზე, მის კეთილგანწყობაზე", — აღნიშნავს გიორგი ასათიანი და ამბობს, რომ სხვადასხვა ფორმატში ინფორმაციის გაზიარება, მიღება ბიზნესში უმთავრესია, რადგან ეს კომპანიას განვითარებაში ეხმარება, საშუალებას იძლევა, რომ მოუსმინო წარმატებულ მაგალითებს და სამომავლო ნაბიჯები უკეთ დაგეგმო.

ფოტო: თიბისი ბიზნესისთვის

პანელური დისკუსიის ერთ-ერთმა დამსწრემ, კომპანია ბიას დირექტორის მოადგილე ნუცა ოთიაშვილმა On.ge-ისთან საუბრისას აღნიშნა, რომ სპიკერების გამოცდილების მოსმენა ღირებული იყო და საქმიანობისას მიღებულ ინფორმაცია მისთვის გამოსადეგი იქნება.

"საინტერესო შეხვედრა იყო, მნიშვნელოვანი აქცენტები დაისვა მომხმარებელთან ურთიერთობის შესახებ, რაც ჩემთვის პრაქტიკული კუთხით საინტერესო იყო. სპიკერების გამოცდილება ღირებულია და გაზიარებადი და კმაყოფილი ვარ. მიღებული გამოცდილება აუცილებლად გამომადგება, რადგან სწორედ ახლა ვმუშაობ პროექტზე, რომელიც ბიზნესისა და მომხმარებლის ურთიერთობას მოიცავს და მიღებულ რჩევებზეც აუცილებლად ვიფიქრებ მუშაობისას", — ამბობს ნუცა ოთიაშვილი.

დავით ჯაფარიძის თქმით, პანელური დისკუსიები თიბისის ბიზნესდაჯილდოების ახალი წამოწყებაა, ამიტომ მათთვის განსაკუთრებით საინტერესოა რეაქციებზე, უკუკავშირზე დაკვირვება, რაც სამომავლო ნაბიჯების დაგეგმვაში დაეხმარებათ.

თიბისის ბიზნესდაჯილდოების მომდევნო პანელური დისკუსია დაახლოებით ერთ თვეში გაიმართება, რომელზეც გამოცდილი სპიკერები დაჯილდოების კიდევ ერთ ნომინაციაზე ისაუბრებენ და აუდიტორიას სასარგებლო რჩევებს გაუზიარებენ.